پشاور(آن لائن)پشاور کے علاقے بشیر آباد میں سیکیورٹی فورسز کی گاڑی کے قریب دھماکے میں تین ایف سی اہلکار شہید اور تین شدید زخمی ہو گئے ،شدت پسندوں کی جانب سے بم سڑک کنارے نصب کیا گیا تھا،سکیورٹی فورسز نے علاقے کو گھیرے میں لے کر سرچ آپریشن شروع کردیا۔اطلاعات کے مطابق بشیر آباد میں نامعلوم دہشت گردوں نے سیکیورٹی فورسز کی گاڑی کو اس وقت نشانہ بنایا جب گاڑی وہاں سے گزر رہی تھی ۔سکیورٹی ذرائع کے مطابق بم سڑک کنارے نصب کیا گیا تھا جو اچانک زور دار دھماکے سے پھٹ گیا جس کے نتیجے میں تین اہلکار شہید اور 3اہلکار زخمی ہو گئے ۔ذرائع کا کہنا ہے کہ دھماکے سے گاڑی کو بھی نقصان پہنچا ہے ۔واقعہ کے فوری بعد ایف سی ، پولیس اور ریسکیو ٹیمیں جائے وقوعہ پر پہنچ گئیں جنہوں نے علاقے کوگھیرے میں لے کر لاشوں اور زخمیوں کو فوری طور پر لیڈی ریڈنگ ہسپتال منتقل کردیا، زخمیوں کی حالت خطرے سے باہر بتائی جاتی ہے ۔ دستی بم حملے میں دو رکشوں کو بھی نقصان پہنچا ہے ۔ زخمیوں میں گاڑی کا ڈرائیور بھی شامل ہے ۔دھماکے کے بعد سیکیورٹی فورسز نے علاقے کی ناکہ بندی کر دی ہے اور سرچ آپریشن کا آغاز کر دیا گیا ہے ۔

موضوعات:پشاور میں دھماکہ