اسلام آباد (مانیٹرنگ ڈیسک) خیرپور ٹامیانوالی میں گزشتہ روز ”رعدالبرق“ مشقوں میں وزیراعظم محمد نواز شریف اور آرمی چیف جنرل راحیل شریف کے درمیان ”خوشگوار ماحول“ میں بات چیت سول ملٹری تعلقات میں بہتری آنے کی عکاس بن گئی ہے جس کے بعد آرمی چیف جنرل راحیل شریف کی مدت ملازمت میں توسیع کے بارے میں قیاس آرائیوں نے زور پکڑ لیا ہے۔

گزشتہ روز خیرپور ٹامیانوالی میں مشقوں میں وزیراعظم محمد نواز شریف اور آرمی چیف جنرل راحیل کے درمیان بات چیت نے اس تاثر کو تقویت دی ہے کہ جنرل راحیل 29 نومبر کو ریٹائر نہیں ہو رہے ہیں۔ مشقوں کے درمیان وزیراعظم اور آرمی چیف کے چہرے پر لوگوں کی نظریں مرکوز رہیں اور ان کے چہروں پر تاثرات نوٹ کئے جاتے رہے۔ ترکی کے صدر طیب اردگان کی پاکستان کے دو روزہ سرکاری دورے پر آمد سے بھی وزیراعظم محمد نواز شریف کو سیاسی و سفارتی سطح پر تقویت ملی ہے۔