لاہور ( این این اائی)لاہور ہائیکورٹ نے پی پی 78جھنگ سے ضمنی انتخابات میں حصہ لینے والے دوامیدواروں احمد لدھیانوی اور راشدہ یعقوب کو نااہل قرار دے دیا۔ گزشتہ روز لاہور ہائیکورٹ کے جسٹس محمدقاسم خان کی سربراہی میں دو رکنی بنچ نے کیس کی سماعت کی۔حلقے کے ووٹروں ایم اسحاق اور اظہر عباس نے دونوں امیدواروں کی انتخابی اہلیت کو عدالت میں چیلنج کر رکھا تھا۔

درخواست گزاروں کے وکلاء نے موقف اپنایا کہ ضمنی انتخابات میں حصہ لینے والی امیدوار راشدہ یعقوب پر غیر قانونی طور پرقرضے معاف کرانے اور احمد لدھیانوی پر کالعدم تنظیموں سے تعلقات اور اثاثے چھپانے کے الزامات ہیں۔دونوں امیدوار آئین کے آرٹیکل 62اور 63کے معیار پر پورا نہیں اترتے لہٰذا معزز عدالت سے استدعا ہے کہ عدالت انہیں انتخابات کے لئے نااہل قرار دے۔ فاضل عدالت نے فریقین کے وکلاء کے دلائل سننے کے بعد فیصلہ سناتے ہوئے دونوں امیدواروں کوانتخابات کے لئے نااہل قرار دے دیا۔یاد رہے اس سے قبل پی پی 78 جھنگ سے راشدہ یعقوب کی نااہلی کا فیصلہ برقرار رکھتے ہوئے سپریم کورٹ نے الیکشن کمیشن کو اس حلقے میں دوبارہ انتخاب کرانے کا حکم دے تھا۔