اسلام آباد (نیوز ڈ یسک) بیرون ملک ملازمت کے خواہشمند افراد کے لیے اہم خبر سامنے آگئی،
فیڈرل انویسٹی گیشن ایجنسی نے کارروائی کرتے ہوئے ورک ویزا کے نام پر شہریوں سے لاکھوں روپے بٹورنے والے تین ملزمان کو گرفتار کر لیا۔تفصیلات کے مطابق ایف آئی اے کے انسدادِ انسانی اسمگلنگ سرکل لاہور نے انسانی اسمگلنگ اور ویزا فراڈ میں ملوث عناصر کے خلاف کریک ڈاؤن کیا، جس کے دوران لاہور اور سیالکوٹ کے مختلف علاقوں میں چھاپے مار کر تین افراد کو حراست میں لیا گیا۔ گرفتار افراد میں ایک ایسا ملزم بھی شامل ہے جو گزشتہ بارہ برس سے قانون نافذ کرنے والے اداروں کو مطلوب تھا۔ایف آئی اے ترجمان کے مطابق ملزم عباس سلہری نے ترکی کے ورک ویزا کا جھانسہ دے کر ایک شہری سے 46 لاکھ روپے وصول کیے، جبکہ لیاقت علی نے کینیڈا ملازمت ویزا کے نام پر 31 لاکھ روپے بٹورے۔ اسی طرح آصف بٹ نے ملائیشیا کے ورک ویزا کا لالچ دے کر شہری سے 2 لاکھ روپے ہتھیا لیے تھے۔حکام کا کہنا ہے کہ آصف بٹ نہایت چالاکی سے کئی برسوں تک گرفتاری سے بچتا رہا اور 2014 سے ایف آئی اے لاہور کو مطلوب تھا۔ طویل عرصے تک روپوش رہنے کے بعد اب اسے ٹریس کر کے گرفتار کر لیا گیا ہے۔ابتدائی تحقیقات میں انکشاف ہوا ہے کہ ملزمان لوگوں کو بیرون ملک روشن مستقبل اور اچھی ملازمت کے خواب دکھا کر بھاری رقوم وصول کرتے تھے۔
رقم لینے کے بعد نہ ویزا فراہم کیا جاتا تھا اور نہ ہی متاثرین کی رقم واپس کی جاتی تھی، بلکہ ملزمان رابطہ ختم کر کے غائب ہو جاتے تھے۔ایف آئی اے نے گرفتار افراد کے خلاف مقدمات درج کر کے مزید تحقیقات شروع کر دی ہیں۔ حکام کے مطابق شہریوں کو دھوکا دے کر ان کی جمع پونجی لوٹنے والوں کے خلاف سخت قانونی کارروائی کی جائے گی جبکہ اس نیٹ ورک سے وابستہ دیگر افراد کی تلاش بھی جاری ہے۔
