اسلام آباد (آن لائن) جمعیت علماء اسلام (ف ) کے سربراہ مولانا فضل الرحمن نے کہا ہے کہ پانامہ لیکس کا آخر کار انجام یہ ہوگا کہ عمران خان اور ان کی ٹیم اسی الزام میں گرفتار ہوجائے گی۔ عمران خان اور ان کے ساتھی نفرت کی علامت بن چکے ہیں آئے روز مؤقف بدلنا اور قلابازیاں کھانا مہذب معاشرے میں برداشت نہیں کیا جاسکتا۔ گزشتہ روز میڈیا سے گفتگو کرتے ہوئے انہوں نے کہا کہ پانامہ لیکس پر وزیراعظم سے استعفیٰ کا مطالبہ بے بنیاد ہے۔ عمران خان اور ان کے ساتھی اب عوام کیلئے ناقابل برداشت ہیں کیونکہ آئے روز یہ اپنے فیصلے بھی بدلتے ہیں اور بیا ن بھی بدلتے ہیں جو کہ سنجیدہ اور مذہب معاشرے میں کسی طور پرقبول نہیں کیا جاسکتا۔ مولانا فضل الرحمان نے کہا کہ اچھا ہواپانامہ لیکس کا معاملہ سپریم کورٹ میں چلا گیا اور اب کایا پلٹ جانا یقینی ہے۔