اسلام آباد (نیوز ڈیسک) نیشنل ڈیزاسٹر مینجمنٹ اتھارٹی نے 21 سے 24 جنوری کے دوران شمالی علاقوں میں متوقع بارشوں اور برفباری کے پیش نظر شہریوں کو محتاط رہنے کی ہدایت جاری کر دی ہے۔

این ڈی ایم اے کے مطابق بالائی خطوں میں موسمی شدت کے باعث دریائے کابل اور اس سے ملحقہ ندی نالوں میں پانی کی سطح اچانک بلند ہونے کا خطرہ موجود ہے۔ دیر، چترال، سوات اور کوہستان کے بعض علاقوں میں سیلابی صورتحال پیدا ہونے کا خدشہ ظاہر کیا گیا ہے۔

اتھارٹی نے عوام پر زور دیا ہے کہ وہ ندی نالوں، نشیبی علاقوں اور ممکنہ خطرے والے مقامات کے قریب غیر ضروری نقل و حرکت سے اجتناب کریں۔ نوشہرہ اور تربیلا ڈیم کے اطراف نشیبی علاقے بھی متاثر ہو سکتے ہیں، جس کے باعث صوبائی اور ضلعی انتظامیہ کو الرٹ رہنے کی ہدایات دی گئی ہیں۔

ادھر بلوچستان کے متعدد اضلاع میں بھی بدھ کے روز سے بارش اور برفباری کی پیش گوئی کی گئی ہے۔ محکمہ موسمیات کے مطابق زیارت، چمن، پشین، قلعہ عبداللہ، قلعہ سیف اللہ اور قلات میں بارش کے ساتھ برفباری کا امکان ہے۔

اس کے علاوہ نوشکی، ہرنائی، ژوب اور موسیٰ خیل میں تیز ہواؤں کے ہمراہ بارش متوقع ہے، جبکہ بارکھان، سبی، لورالائی، کیچ، گوادر، لسبیلہ، آواران اور چاغی کے علاقوں میں بھی بارش برسنے کا امکان ظاہر کیا گیا ہے۔