اسلام آباد(مانیٹرنگ ڈیسک) سینئر سیاستدان اور سابق وفاقی وزیر مملکت نبیل گبول نے کہا ہے کہ پولیس کے پاس ضرور کوئی ایسی انٹیلی جنس رپورٹس ہوں گی جن کی بنا پر پاکستان پیپلز پارٹی (پی پی پی) کے سابق سینیٹر سید فیصل رضا عابدی کو گرفتار کیا گیا۔نجی ٹی وی پروگرام میں کراچی کی موجودہ صورتحال پر گفتگو کرتے ہوئے نبیل گبول کا کہنا تھا کہ ‘پولیس نے کسی اور کو کیوں گرفتار نہیں کیا، لہٰذا وہ بہتر جانتے ہیں کہ آیا ایسے کون سے ثبوت ہیں جن پر فیصل رضا عابدی کی گرفتاری عمل میں آئی’۔انھوں نے کہا کہ اس بات میں کوئی دو رائے نہیں کہ قانون نافذ کرنے والے اداروں نے کراچی شہر میں گذشتہ تین سالوں میں امن و امان کی صورتحال کو بہتر بنانے کے لیے بہت کام کیا ہے، لیکن ہوسکتا ہے کہ اب وہ جرائم پیشہ عناصر ایک مرتبہ پھر سے سرگرم ہوں جوکہ کہیں چھپے ہوئے تھے۔ان کا کہنا تھا کہ شہر کے حالات پر وزیراعلیٰ ہاؤس میں ایک ہم اجلاس ہوا ہے اور وہ امید کرتے ہیں کہ ان عناصر کے خلاف کریک ڈاؤن شروع ہوجائے گا۔شہر میں ایک بار پھر سے فرقہ وارانہ واقعات کی بڑھتی لہر سے متعلق پوچھے گئے سوال کا جواب دیتے ہوئے نبیل گبول کا کہنا تھا کہ بہت سے عناصر ایران اور بھارت کی سرحدوں سے اس کوشش میں مصروف ہیں کہ کسی طرح بلوچستان اور کراچی میں اس قسم کے فرقہ وارانہ واقعات کو پھیلایا جائے۔ان کا مزید کہنا تھا کہ متحدہ قومی موومنٹ (ایم کیو ایم) کے بارے میں سب کو معلوم ہے کہ وہ بھارتی خفیہ ایجنسی ‘را’ سے فنڈننگ حاصل کرے اسی کے کہنے پر جنوبی افریقہ سے لوگوں کو کراچی بلاتی ہے جس سے یہاں پر حالات کو خراب کیا جاتا ہے۔انھوں نے کہا کہ ایم کیو ایم کا عسکری ونگ ٹوٹ پھوٹ کا شکار تو ضرور ہے، لیکن وہ پوری طرح سے ختم نہیں ہوا۔