سرینگر(آئی این پی) کل جماعتی حریت کانفرنس کے سینئر رہنما اور اسلامک پولیٹکل پارٹی جموں کشمیر کے سربراہ محمد یوسف نقاش نے پریس کے نام جاری بیان میں کہا کہ بھارت کے تمام ادارے جنگی جنون میں مبتلا ہو کر اپنے عوام کو گمراہ کر رہیں ہیں اور انہیں اصل موجودہ صورت حال کے سلسلے میں بالکل دھوکے میں رکھ رہیں ہیں۔انہوں نے کہا کہ بھارت کے سارے ادارے خصوصاً اس کا متعصب میڈیا جنگی جنون میں مبتلا ہیں اور اپنے عوام کو پاکستان اور کشمیر کے بارے میں بالکل مکر و فریبی سے کام لے رہیں ہیں۔بھارتی حکمرانوں کو پاکستان کے خلاف بے بنیاد اور غیر ذمہ دارانہ الزامات کا سلسلہ بند کرنے کا مشورہ دیتے ہوئے نقاش نے بھارتی متعصب میڈیا کی اشتہار بازی کو شرمناک قرار دیا اور کہا کہ بھارتی میڈیا میں اخلاقیات اور اصولوں کی کوئی قدر نہیں بلکہ جھوٹ اور پروپیگنڈا ہی اس کی بنیاد ہیں۔ اب انہیں اپنے لوگوں کو مزید بڑھکانے سے گریز کرنا چاہئیے۔حریت رہنما نے کہا کہ جو کچھ بھارت اس وقت کر رہا ہے اس کے پیچھے مقصد یہی ہے کہ وہ دنیا کی توجہ کشمیر سے ہٹاکر پاکستان پر لگائے دہشت گردی کے الزام پر مرکوز کرنا چاہتا ہے کیونکہ کشمیر میں پچھلے تین مہینے سے بھارت نے جبر و بربریت کی انتہا کر دی جہاں نہتے عوام کو گولیوں اور پیلٹ گن کا نشانہ بنایا جارہا ہیں اور سینکڑؤں کی بینائی ختم ہوچکی ہیں۔حریت رہنما نے کٹھ پتلی وزیر اعلیٰ محبوبہ مفتی کی شدید تنقید کرتے ہوئے کہا کہ وہ ابھی بھی اپنی کرسی بچانے کی فکر میں لگی ہوئی ہے اور اسے کشمیریوں پر گزر رہی حالات پر ذرا بھی دُکھ یا احساس نہیں ہیں۔یہ شرم کی انتہا ہے ۔

موضوعات:پاک بھارت کشیدگی کشمیر