اسلام آباد(مانیٹرنگ ڈیسک)مسلم لیگ (ن) کے اہم رہنما اور ترجمان پنجاب حکومت زعیم قادری کی زبان پھسل گئی۔ زعیم قادری نے میڈیا سے گفتگو کرتے ہوئے کہا کہ انشاء اللہ میاں نوازشریف جلد نا اہل ہو جائیں گے۔ زعیم قادری کے بیان پر میڈیا انگشت بدنداں رہ گیا اور جب میڈیا نے تصحیح کروائی تو زعیم قادری کھسیانی ہنسی ہنسنے لگے۔ پنجاب حکومت کے ترجمان زعیم قادری نے کہا ہے کہ کسی کے گھر کا محاصرہ کرنا جمہوری روایات نہیں ہیں تاہم ہمیں اپنے گھر کی حفاظت کرنا آتی ہے ان سے جب پوچھا گیا کہ عمران خان نے رائیونڈ کی بات کی ہے جاتی عمرہ کی نہیں کیا پورا رائیونڈ وزیراعظم ہاؤس ہے تو زعیم قادری نے خاموشی اختیار کرلی تاہم انہوں نے کہا کہ عمران خان ان دنوں ہوا میں اڑ رہے ہیں وہ 90دن میں نارمل ہوجائیں گے ان خیالات کا اظہار انہوں نے ایک تقریب میں میڈیا سے گفتگو کرتے ہوئے کیا۔ انہوں نے کہا کہ عمران خان کی دھمکی ذاتی نوعیت کی ہے سیاست میں ذاتیات نہیں آنی چاہیے۔

موضوعات:زعیم قادری