کراچی (این این آئی) وزیراعظم محمد نواز شریف پاکستان نیوی وار شپ ٹینکر فلیٹ کی افتتاحی تقریب میں مہمان خصوصی کی حیثیت سے شرکت کیلئے کل کراچی آئیں گے۔ یہ تقریب کراچی شپ یارڈ اینڈ انجینئرنگ ورکس میں منعقد ہوگی۔ 17ہزار ٹن وزنی فلیٹ ٹینکر وزارت دفاعی پیداوار اور پاک بحریہ کے تحت ترکی کے میسرز ایس ٹی ایم کے اشتراک کار سے تعمیر کیا گیا ہے، پاکستان نیوی فلیٹ ٹینکر پاک بحریہ کی لاجسٹس ضروریات پوری کرنے میں معاون ہوگا۔وزیراعظم آفس کی طرف سے جاری بیان کے مطابق یہ فلیٹ ٹینکر برادر ترکی کے ساتھ وسیع تعاون اور خود انحصاری کے حوالے سے پاکستان کی کوششوں کی ایک اہم مثال ہے۔ اس شپ کا ڈیزائن ترکی نے تیار کیا ہے اور اسے کراچی شپ یارڈ میں پاکستانی ہنرمند افرادی قوت نے تعمیر کیا ہے جو برادر ممالک کے ساتھ مشترکہ منصوبوں کے ذریعے مقامی طور پر صلاحیت حاصل کرنے کا عمدہ امتزاج ہے۔ فلیٹ ٹینکر کا ڈیزائن عصری رجحانات پر مبنی اور نیول شپس کی درجہ بندی کیلئے بیوروویری ٹاس رولز کے مطابق ہے۔
بیان کے مطابق پاکستان اور ترکی آزمودہ دوست ہیں، فلیٹ ٹینکر کی تعمیر جیسے مشترکہ منصوبے سے مشترکہ عقیدے، ورثے اور مفدات سے عبارت باہمی رشتے مزید تقویت پائیں گے۔ یہ اقدام یقینا مقامی وارشپ کی تعمیر اور دیگر دفاعی مصنوعات کے شعبہ میں پاک ترک تعاون کیلئے مزید مواقع پیدا کرے گا۔ فلیٹ ٹینکر کی مقررہ مدت سے 2ماہ قبل تکمیل ترکی کی حکومت اور عوام کی طرف سے یوم آزادی تقریبات کے موقع پر پاکستانی قوم کیلئے ایک تحفہ ہے۔