کراچی (مانیٹرنگ ڈیسک) سندھ کے وزیر منظور وسان نے کہاہے کہ چوہدری نثار پتہ نہیں کس لائن پر چل رہے ہیں ، 2018 پیپلزپارٹی کی جیت کا سال ہے۔ سندھ سیکرٹریٹ کے باہر صوبائی وزیر صنعت منظور وسان کا میڈیا سے بات چیت کرتے ہوئے کہنا تھا کہ پاکستان میں ہمارا ووٹ بینک بڑھ رہا ہے۔ 2018 پیپلز پارٹی کی جیت کا سال ہے۔ سندھ میں نہیں پورے پاکستان میں جیتیں گے۔
مراد علی شاہ کے وزیر اعلیٰ بننے پر دیگرصوبوں کے لوگ حیران ہیں۔ وزیر اعلی متحرک ہو جائے تو وزراء بھی متحرک ہو جاتے ہیں۔ پنجاب میں پیپلز پارٹی کو موقع ملا تو سندھ کی طرح ترقی دلائیں گے۔ پنجاب اور خیبر پختونخواہ سے فون آرہے ہیں سندھ میں کیسے تبدیلی آگئی۔ ان کا مزید کہنا تھا کہ چوہدری نثار پتہ نہیں کس لائن پر چل رہے ہیں۔ لگتا ہے چودھری نثار رات کو محبت دن کو نفرت کرتے ہیں۔ ہم لائن سے نہیں اترے چودھریوں کا کام لائن سے اترنا ہے۔