لاہور ( این این آئی) انڈونیشیا میں پاکستانی شہری ذوالفقار علی کی سزائے موت معطل ہونے پر اہل خانہ کے گھر دوسرے روز بھی عید کا سماں رہا ، خوشی کے نعرے اور ڈھول کی تھاپ پر بھنگڑے جاری رہے جبکہ مبارکباد دینے والوں کا بھی تانتا بندھا رہا ۔تفصیلات کے مطابق روزگار کے سلسلے میں انڈونیشیا جانیوالے لاہور کے ذوالفقار علی کو2004ء میں منشیات ا سمگلنگ کے الزام میں گرفتار کیا گیا ۔ عدالت نے سزائے موت سنادی ، ذوالفقار علی سمیت 14افراد کو جمعرات کے روز سزائے موت دی جانی تھی۔ذوالفقار علی کے اہلخانہ کسی معجزے کے منتظر تھے اور پھر دعائیں قبول ہوگئیں ۔ سزا ٹل جانے کی نوید آ گئیجس کے باعث اہل خانہ کے چہروں پر چھائے غم کی جگہ خوشی نے لے لی ،دکھ کے آنسو خوشی کے آنسوبن گئے ۔سزا معطل ہونے کی خبر پرمغل پورہ میں ذوالفقار علی کے گھر پر دوسرے روز بھی عید کا سماں رہا ، رشتے دار،دوست ،اہل محلہ جس نے سنا مبارک باد دینے پہنچا ،مٹھائیاں بانٹی گئیں، ہر چہرے پر خوشی ہے۔اہل خانہ پرامید ہیں کہ سزا معطل ہونے کا معجزہ ہوا ہے توذوالفقار علی کو جلد رہائی بھی ملے گی۔