ڈی جی خان(نیوز ڈیسک)صوبائی وزیر تعلیم پنجاب رانا مشہود احمد خان نے کہا ہے کہ مسلم لیگ ن کی حکومت نے 2008 کے مقابلے میں تعلیم کا بجٹ 490فیصد تک بڑھا دیاہے . اساتذہ کی کمی پوری کرنے کیلئے مزید 84000آسامیوں پر بھرتی کی جائے گی. نجی تعلیمی ادارے صوبہ میں شرح خواندگی بہتر کرنے کیلئے اہم کرداراداکر رہے ہیں ۔ انہوں نے یہ بات گزشتہ روز ڈیرہ غازیخان کے دورہ کے دوران انڈس انٹر نیشنل انسٹی ٹیوٹ کے معائنہ کے موقع پر بات چیت کرتے ہوئے کہی . اس موقع پر چیئرمین قائمہ کمیٹی برائے مذہبی امور ؍ ایم این اے حافظ عبدالکریم، ایگزیکٹو ڈائریکٹر انڈس انٹرنیشنل انسٹی ٹیوٹ ڈاکٹر قاضی عبدالسبحان طارق ،غازی یونیورسٹی کے خزانچی ڈاکٹر ندیم اقبال ، پرنسپل ادارہ سلمان محمود ، ایڈمن آفیسر راشد خان لغاری ، طاہر غلزئی ، ڈاکٹر محمد سلیم ، ڈائریکٹر کالجز ڈاکٹرالطاف حسین ، ڈپٹی ڈائریکٹر پروفیسر مظہر حسین گشکوری او رمتعلقہ افسران موجود تھے . صوبائی وزیر رانا مشہود احمد نے کہاکہ نجی تعلیمی اداروں کے جائز مسائل کے حل کیلئے ہر ممکن کردار ادا کیا جائے گا ۔ وزیر تعلیم نے کہاکہ حکومت پنجاب ہر بچہ کو زیور تعلیم سے آراستہ کرنے کیلئے انقلابی اقدامات کر رہی ہے، اس سلسلے میں تعلیمی بجٹ کو سو فیصد استعمال کیا جاتا ہے جبکہ خیبرپختونخواہ میں تعلیمی بجٹ کا صرف 43فیصد خر چ کیاگیا. انہوں نے کہاکہ چائلڈ لیبر کے خاتمے کیلئے نجی تعلیمی ادارے حکومت کا ساتھ دیں ۔ اس موقع پر صوبائی وزیر نے انسٹی ٹیوٹ کے مختلف شعبوں ، کلاسز ، لائبریری او رلیبارٹریز کا معائنہ کیا . طلباؤطالبات سے گفتگو کے علاوہ ایم این اے حافظ عبدالکریم کی تعلیم کے شعبہ میں خدمات کو سراہا۔صوبائی وزیر کو بتایاگیا کہ انڈس انسٹی ٹیوٹ کے 177طلباوطالبات نے بی ایس کمپیوٹر سائنس ،بی بی اے ، ایم بی اے ، ایم اے انگلش ، ایم ایس سی میتھ ،اکنامکس اور ایم اے ماس کمیونیکیشن کی ڈگری مکمل کر لی ہے . ادارہ کا جی سی یونیورسٹی فیصل آباد سے الحاق کیاگیاہے۔