بریکوٹ(آئی این پی )خیبر پختون خوا کے سینئر وزیر برائے آبپاشی و سماجی بہبود سکندر شیرپاؤ نے کہاہے کہ پانامہ لیکس کے معاملے پر پہلے تحقیقات کی جائے اور بعد میں ملوث ہونے پر سخت سزائیں دی جائیں ۔7اگست سے شروع ہونے والے دھرنوں اور احتجاجوں میں قومی وطن پارٹی شامل نہیں ہے کیونکہ دھرنوں اوراحتجاجوں کا فیصلہ ان کا ذاتی ہے اس پرہمارے اتحاد پر کوئی منفی اثرات مرتب نہیں ہوں گے ۔ان خیالات کا اظہار انہوں نے تحصیل بریکوٹ میں ضلعی رہنماء اقبال خان اورقومی وطن پارٹی کے سابق امیدوار پی کے 81افضل شاہ باچا ،ظاہر شاہ باچہ کی بہن اور فضل ودود باچہ کی خالہ کے فاتحہ خوانی کے موقع پر میڈیاسے خصوصی گفتگو کے دوران کیا ۔اس موقع پر ڈویژنل صدر فضل رحمان عرف نونو،ڈویژنل سیکرٹری جنرل صدیق علی خان ،ضلعی صدر شیربہادر ذادہ ،سابق پی کے 81صدر طاہر خان ،رحم غفران سابق سوشل میڈیا سیکرٹری کے علاو ہ اہم پارٹی قائدین اور ورکرز موجودتھے ۔انہوں نے کہاکہ صوبائی حکومت کی اولین ترجیح یہی ہے کہ بلدیاتی نظام میں موجود خامیوں کودور کرے ۔انہوں نے کہاکہ بلدیاتی نظام کو ناظمین کے مشاورت سے تبدیلیاں لارہے ہیں تاکہ یہ نظام عوام کی فلاح و بہبود میں اہم کردار ادا کریں ۔