کراچی (این این آئی)وزیر اعلیٰ سندھ سید قائم علی شاہ اور کور کمانڈر کراچی لیفٹیننٹ جنرل نوید مختار کے درمیان جمعہ کو ہونے والی ملاقات کے بعد سندھ میں رینجرز کے قیام اور اختیارات میں توسیع کے حوالے سے اہم پیش رفت سامنے آئی ہے ۔صوبے میں رینجرز کے قیام کے حوالے سے آئندہ 24 سے 48گھنٹے کے دوران نوٹی فکیشن جاری ہونے کا امکان ہے ۔یہ تمام اقدامات پیپلزپارٹی کے چیئرمین بلاول بھٹو زرداری کی ہدایت پر ہورہے ہیں ۔ذرائع کے مطابق سندھ میں رینجرز کے قیام اور اختیارات میں توسیع کے حوالے سے گزشتہ کئی روز جاری معاملات اپنے حل کے قریب پہنچ گئے ہیں ۔جمعہ کو کورکمانڈر کراچی لیفٹیننٹ جنرل نوید مختار اور وزیراعلیٰ سندھ سید قائم عل شاہ کے درمیان ہونے والی ملاقات میں اس اہم مسئلے پر تفصیلی گفتگو کی گئی ۔ذرائع نے بتایا کہ کور کمانڈ ر کراچی نے رینجرز کے اختیارات میں توسیع نہ کیے جانے کے حوالے سے تشویش کا اظہار کیا اور معاملات کو خوش اسلوبی سے حل کرنے پر زور دیا ۔وزیراعلیٰ سندھ نے اس ملاقات میں یقین دہانی کرائی کہ پارٹی قیادت کی مشاورت سے صوبے میں رینجرز میں قیام اور ان کے اختیارات میں توسیع کے حوالے سے معاملے کو جلد حل کرلیا جائے گا۔سندھ حکومت صوبے اور خصوصاً کراچی میں قیام امن کیلئے رینجرز کے کردار کی معترف ہے اور چاہتی ہے کہ رینجرز قیام امن کے لیے اپنا کردار ادا کرتی رہے ۔ذرائع کے مطابق اس ملاقات کے بعد وزیراعلیٰ سندھ نے پاکستان پیپلزپارٹی کے چیئرمین بلاول بھٹو زرداری سے ملاقات کی اور ان کو کورکمانڈر کراچی سے ہونے والی ملاقات کی تفصیلات سے آگاہ کیا ۔پارٹی چیئرمین نے وزیراعلیٰ سندھ کو ہدایت کی کہ تمام قانونی پہلوؤں کا جائزہ لے کر رینجرز کے قیام اور اختیارات میں توسیع کے حوالے سے اقدامات کیے جائیں ۔ذرائع کا کہنا ہے کہ بلاول بھٹو زرداری ہفتہ کی شام کراچی سے دبئی روانہ ہوگئے ہیں ،جہاں وہ سابق صدر آصٖف علی زداری سے ملاقات کریں گے جبکہ وزیراعلیٰ سندھ سمیت پیپلزپارٹی کی اعلیٰ قیادت بھی دوبئی روانہ ہورہی ہے ،جہاں پارٹی کے مشاورتی اجلاس منعقد ہوں گے ۔ذرائع کے مطابق پیپلزپارٹی کی قیادت نے صوبے میں رینجرز کے قیام اور اختیارات میں توسیع دینے کا حتمی فیصلہ کرلیا ہے اور حکومت سندھ صوبہ میں رینجرز کے قیام میں ایک سال کی توسیع کے سلسلے میں نوٹیفکیشن جلد جاری کرے گی۔ امکان ہے کہ آئندہ 24 سے گھنٹوں میں یہ نوٹیفکیشن جاری کردیا جائے گا ۔ادھر ذرائع کا یہ بھی کہنا ہے کہ سندھ اسمبلی کا اجلاس جولائی کے آخرمیں یا اگست کے پہلے ہفتے میں بلایا جاسکتا ہے ۔