پشاور(این این آئی)وزیراعلی خیبرپختونخوا پرویزخٹک نے کہا ہے کہ آئل ریفائنری کی کرک منتقلی سے متعلق باقاعدہ کوئی فیصلہ نہیں ہوا ہے تاہم آئل ریفائنری قابل عمل اور موزوں جگہ پر ہی بنے گی۔افغان مہاجرین کودسمبر2016 تک ٹائم دیا ہے اور ہمیں امید ہے کہ اگلے چھ مہینوں میں ان کی باعز ت واپسی کا انتظام ہو جائے گا۔وزیر اعلیٰ خیبر پختونخو ا پرویز خٹک سپیکر صوبائی اسمبلی اسد قیصر، وزیر قانون امتیاز شاہد قریشی اور رکن صوبائی اسمبلی ضیاء اﷲ بنگش کے ہمراہ منگل کے روز مختصر دورے پر کوہاٹ پہنچے جہاں انہوں نے پی ٹی آئی کے سابق ضلعی صدر محمد ہمایون چاچا مرحوم کی وفات پر فاتحہ خوانی کی اور لواحقین کے ساتھ دلی ہمدردی کا اظہار کیا ۔ وزیر اعلیٰ نے کوہاٹ میں پی ٹی آئی کو فعال بنانے کے لئے مرحوم محمد ہمایون چاچاکی خدمات کو زبردست خراج عقیدت پیش کرتے ہوئے کہا کہ مرحوم پارٹی کا عظیم اثاثہ تھے ان کی موت سے پارٹی ایک مخلص اور سچے کارکن سے محروم ہو گئی۔وہ ملنسار، غریب پرور اور عاجز انسان تھے اور پوری پارٹی کو ان پر ناز ہے۔ان کا کہنا تھا کہ پارٹی کی ترقی کے لئے ان کی خدمات کو مدتوں تک یاد رکھا جائے گا۔ اس موقع پرمیڈیا سے گفتگو کرتے ہوئے پرویز خٹک نے آئل ریفائنری کی کرک منتقلی سے متعلق کہا کہ ایسا کوئی باقاعدہ فیصلہ نہیں ہوا ہے تاہم آئل ریفائنری قابل عمل اور موزوں جگہ پر ہی بنے گی۔افغان مہاجرین کی واپسی سے متعلق ایک سوال کا جواب دیتے ہوئے انہوں نے کہا کہ ہم نے وفاق کو دسمبر2016 تک ٹائم دیا ہے اور ہمیں امید ہے کہ اگلے چھ مہینوں میں ان کی باعز ت واپسی کا انتظام ہو جائے گا۔وزیر اعلیٰ نے سی پیک منصوبے کا ذکرکرتے ہوئے کہا کہ اس منصوبے کے تحت پشاور ایکسپریس وے کو فیڈرل بجٹ میں شامل کرنے کے علاوہ جھنڈ سے کوہاٹ تک روڈ اور پشاور سے ڈی آئی خان تک ریلوے ٹریک بھی تعمیر کیا جائے گا۔انہوں نے کہا کہ سی پیک منصوبہ ملک کی خوشحالی کا منصوبہ ہے اور اس سے خیبر پختونخوا سمیت پورا ملک ترقی کی شاہراہ پر گامزن ہو گا۔دریں اثناء وزیر اعلیٰ پی ٹی آئی کے ضلعی رہنما آفتاب عالم آفریدی کی رہائش گاہ پر بھی گئے اور ان سے ان کی خوشدامن کے انتقال پر فاتحہ خوانی کی اور مرحومہ کے ایصال ثواب کے لئے دعا کی۔