اسلا م آباد(مانیٹر نگ ڈیسک )سابق صدر آصف علی زرداری نے ماڈل قندیل بلوچ کے قتل پر اظہار مذمت کرتے ہوئے غیرت کے نام پر قتل کےخلاف قانون سازی کیلئے پارلیمنٹ کا مشترکا اجلاس بلانے کا مطالبہ کیا ہے۔سابق صدر کے ترجمان فرحت اللہ بابر کی طرف سے جاری بیان کے مطابق غیرت کے نام پر قتل سنگین ترین جرم ہوتا ہے، ایسے قتل کےخلاف سینیٹ نے مارچ 2015میں قانون کا بل منظور کیا تھا،اس کے بعد سے مذکورہ قانون کا بل پارلیمنٹ سے منظوری کا منتظر ہے۔ سابق صدر نے کہا کہ غیرت نام پر قتل کےخلاف بل کو تمام جماعتیں منظور کرچکی ہیں لیکن اس کے بعد بھی پارلیمنٹ سے منظور نہ ہونا قابل تعجب ہے۔ سابق صدر نے وزیراعظم نوازشریف کو مخاطب کرتے ہوئے بیان میں کہا کہ وہ وعدہ کے مطابق مذکورہ قانون کا بل پارلیمنٹ سے منظور کرائیں ۔
غیرت کے نام قتل کی روک تھام سے متعلق ترمیمی بل پراتفاق رائے کیلئے پارلیمانی کمیٹی کا اہم اجلاس 21جولائی کو طلب کرلیا گیا ہے۔پارلیمانی کمیٹی کے اجلاس میں اتفاق رائے کے بعدبل پارلیمنٹ کے مشترکہ اجلاس میں منظوری کیلئے پیش کیا جائیگا۔پارلیمانی کمیٹی کا اجلاس وزیر قانون زاہد حامد کی صدارت میں ہوگاجس میں سینیٹ سے منظور کردہ پیپلزپاٹی کے دو بلو ں کا جائزہ لیا جائیگا۔اجلاس میں غیرت کے نام پر قتل سے متعلق سینیٹر صغری ٰ امام کے ترمیمی بل اورسینیٹر فرحت اللہ بابر کا جنسی تشدد کی روک تھام کا ترمیمی بل بھی زیر غور آئیگا۔ذرائع کا کہنا ہے کہ دونوں بلوں پر جے یو آئی ف کے اعتراضات تھے جنھیں دور کرلیا گیا ہے۔پارلیمانی کمیٹی میں اتفاق رائے کی صورت میں دونوں بل پارلیمنٹ کے مشترکہ اجلاس میں پیش کئے جائینگے۔