کراچی (مانیٹر نگ ڈیسک )کراچی کے علاقے گلبائی کی ٹائرفیکٹری میں لگنے والی آگ پر تاحال قابو نہیں پایا جاسکا ہے ۔فائر بریگیڈ حکام کی جانب سے آگ کو تیسرے درجہ کی آگ قراردیا جارہا ہے ۔گلبائی کی ٹائر فیکٹری میں لگنے والی آگ پرقابوپانے کے لیے فائر بریگیڈ کےعملے کو پانی کی کمی کاسامنا ہے جبکہ آگ بجھانے کے لیے نیوی،ایئرفورس کے فائر ٹینڈرزکو بھی طلب کر لیئے گئے ہیں ۔فائر بریگیڈ حکام کے مطابق اس سے قبل آج سائٹ ایریا فیکٹری میں بھی آگ لگی تھی جس پر قابو پالیا گیا ہے۔ذرائع کے مطابق سائٹ ایریا فیکٹری کی آگ شارٹ سرکٹ کے باعث لگی تھی جس میں لاکھوں روپے کا قیمتی سامان جل گیا تھا۔ آگ بجھانے کے عمل میں 18فائر ٹینڈر نے حصہ لیاتھا ۔جبکہ آگ آج صبح لگی تھی جس نے دیکھتے ہی دیکھتے فیکٹری میں موجود سامان کو اپنی لپیٹ میں لے لیا ، فیکٹری میں کپڑا ،تاریں اور ٹائروں کی بڑی تعداد موجود تھی جس کو آگ نے تیزی سے اپنی لپیٹ میں لے لیا ، آگ لگنے کی اطلاع ملتے ہی فائر بریگیڈ کی گاڑیاں موقع پر پہنچ گئی تھیں جنہوں نے کئی گھنٹوں کی کوشش کے بعد آگ پر قابو پالیا ہے ۔ حادثہ گلبائی ٹائر فیکڑی کے گودام میں پیش آیا جہاں رکھے ہوئے ٹائروں کو آگ نے اپنی لپیٹ میں لے لیا ۔ اس کے علاوہ گودام میں موجود کپڑا اور دیگر سامان بھی آگ کی لپیٹ میں آگیا ۔ ذرائع کا کہنا ہے کہ آگ لگنے بعد شروع میں فائر بریگیڈ کی دو گاڑیاں موقع پر پہنچیں مگر اس کے بعد آگ کی شدت کو مدنظر رکھتے ہوئے مزید 7 گاڑیاں موقع پر بھیج دی گئیں جنہوں نے آگ پر قابو پانے کی کوشش کی ۔ دوسری جانب کراچی میں مزید دو مقامات پر بھی آتشزدگی کی اطلاعات موصول ہوئی ہیں جہاں بھیجنے کیلئے عملے کے پاس گاڑیاں ہی نہیں ہیں ، متعدد خراب گاڑیاں گودام میں ہیں جبکہ 25 گاڑیاں خراب حالت میں کباڑ بن چکی ہیں اور مختلف فائر سٹیشنز پر کھڑی ہیں ۔ جس کی وجہ سے آگ بجھانے کی کوششوں میں مشکلات کا سامنا کرنا پڑ رہا ہے ۔