اسلام آباد (مانیٹرنگ ڈیسک) اسلام آباد پولیس کے کمانڈو نے تھانہ بنی گالہ کی حدود میں درانی سٹریٹ میں خاتون وکیل کے گھر میں گھس کر فائرنگ کر کے خاتون وکیل کے شوہر کو موت کے گھاٹ اتار دیا اور خود کو گولی مار کر خودکشی کر لی۔ فائرنگ کے نتیجہ میں خاتون وکیل اور گھریلو ملازمہ شدید زخمی ہوگئیں۔ تفصیلات کے مطابق بدھ اور جمعرات کی درمیانی شب اسلام آباد پولیس کے انسداد دہشتگردی سکواڈ کے کمانڈو محمد محمود نے تھانہ بنی گالہ کے علاقہ درانی سٹریٹ میں واقع خاتون وکیل ارم ایڈووکیٹ کے گھر میں گھس کر اپنے پستول سے فائرنگ کر دی جس کے نتیجہ میں خاتون وکیل کا شوہر ارشد موقع پر ہی جاں بحق ہو گیا جبکہ فائرنگ سے ارم ایڈووکیٹ اور اس کی گھریلو ملازمہ گل نثار شدید زخمی ہو گئیں۔ پولیس وقوعہ کی تفصیلات بتانے سے گریز اور حقائق چھپانے کی کوشش کرتی رہی۔ اس بارے میں ایس پی سرکل رضوان گوندل سے رابطہ کی کوشش کی گئی مگر ان سے بات نہ ہو سکی۔ تھانہ بنی گالہ کے ایس ایچ او محمد اسلم نے بتایا کہ وجہ تنازعہ کا فوری طور پر علم نہیں ہو سکا تاہم محمد محمود جو اسلام آباد پولیس میں کمانڈو ہے، نے فائرنگ کر کے ارشد نامی شخص کو موت کے گھاٹ اتار دیا اور پھر خود کو کنپٹی پر گولی مار کر زندگی کا خاتمہ کر لیا۔ پولیس اہلکار کی فائرنگ سے دو خواتین ارم ایڈووکیٹ اور ان کی گھریلو ملازمہ گل نثار شدید زخمی ہو گئیں، دونوں کی حالت تشویشناک بتائی جاتی ہے۔ ڈیوٹی افسر عمران اے ایس آئی کے مطابق پولیس اہلکار نے کچھ عرصہ قبل ارشد سے گھر کرایہ پر لیا تھا تاہم بعد میں پولیس اہلکار کی مشکوک حرکات کو دیکھتے ہوئے انہوں نے پولیس اہلکار سے گھر خالی کروا لیا، جسکا محمد محمود کو شدید رنج تھا اور وہ مالک مکان کو سنگین نتائج کی دھمکیاں دیتا رہا۔ پولیس ترجمان نے بتایا کہ پولیس نے موقع پر پہنچ کر نعشیں اور زخمیوں کو پمز ہسپتال بھجوا دیا۔ ابتدائی رپورٹ درج کر کے تحقیقات کا آغاز کر دیا گیا۔