کراچی (این این آئی) متحدہ قومی موومنٹ (ایم کیو ایم) کے ڈپٹی کنوینر ڈاکٹر فاروق ستار نے معروف قوال امجد صابری کے قتل کی مذمت کرتے ہوئے انکشاف کیا ہے کہ امجد صابری نے کچھ لوگوں کے پروگراموں میں جانے سے انکار کیا تھا اور یہ بات امجد صابری نے خود انہیں پانچ روز قبل بتائی تھی۔ میڈیا سے گفتگو کرتے ہوئے ڈاکٹر فاروق ستار نے کہا کہ یہ واقعہ ا نتہائی افسوسناک ہے اور ذمہ داران کو کیفر کردار تک پہنچایا جانا چاہئے۔ انہوں نے کہا کہ پورے تین سال کے آپریشن کے باوجود بھی کراچی میں خوف کی فضاء ہے۔ دہشت گرد جب چاہتے ہیں تو اپنے ٹارگٹ کو باآسانی نشانہ بناتے ہیں اور ایسے واقعات خوف پیدا کرتے ہیں۔ انہوں نے کہا کہ ایک مرتبہ پھر سازش کے تانے بانے بنے جارہے ہیں۔ کراچی کے حالات خراب کئے جارہے ہیں۔ امجد صابری کو گھات لگا کر قتل کیا گیا۔ انہوں نے مطالبہ کیا کہ امجد صابری کے قاتلوں کو فی الفور گرفتار کرکے بے نقاب کیا جائے۔