کراچی(این این آئی)پولیس کے مطابق موٹر سائیکل پر سوار 2دہشت گردوں نے ٹریفک کے دباؤ کا فائدہ اٹھاتے ہوئے امجد صابری کی گاڑی پر اس وقت فائرنگ کی جب ان کی گاڑی کی رفتار انتہائی کم تھی۔دہشتگردوں نے ان کی گاڑی پر متعدد گولیاں چلائیں۔ عینی شاہدین کے مطابق ایک موٹر سائیکل پر دو مسلح دہشت گرد سوار تھے۔ گاڑی آہستہ ہونے پر موٹر سائیکل پر پچھلی نشست پر بیٹھے دہشت گرد نے گاڑی کے فرنٹ پر فائرنگ کی۔ دہشتگردوں نے اطمینان سے کارروائی کی اور موقع سے فرار ہونے میں کامیاب ہو گئے۔ ایس ایس پی سینٹرل مقدس حیدر کا کہنا ہے کہ دہشت گرد امجد صابری کا پیچھا کر رہے تھے موقع پا کر ٹارگٹ کیا۔ امجد صابری کو چار سے پانچ گولیاں لگیں۔ جائے وقوعہ سے گولیوں کے خول جمع کئے جا رہے ہیں۔ تفصیلات جمع کی جا رہی ہیں۔ ابھی حتمی کچھ کہنا قبل ازوقت ہوگا۔ ہسپتال ذرائع کے مطابق امجد صابری کو سر اور سینے پر گولیاں لگیں۔ امجد صابری ایک نجی ٹی وی کے پروگرام کی ریکارڈنگ کیلئے جا رہے تھے ،واضح رہے کہ شریف آباد تھانے کی حدود لیاقت آباد نمبر 10 موٹر سائیکل سوار ملزمان نے ہنڈا سٹی کار نمبر BEE-797 پر فائرنگ کردی۔فائرنگ کی زد میں آکر کار میں سوار عالمی شہرت یافتہ قوال امجد صابری اور ان کے عزیز سلیم صابری سمیت 3افراد زخمی ہو گئے۔ زخمیوں کو طبی امداد کے لئے اسپتال منتقل کیا جا رہا تھا کہ امجد صابری اور ان کے ڈرائیور زخموں کی تاب نہ لاتے ہوئے دم توڑ گئے جبکہ ان کے عزیز سلیم صابری عباسی شہید اسپتال میں دوران علاج چل بسے۔ واقعہ کے بعد رینجرز اور پولیس کی بھاری نفری موقع پر پہنچ گئی اور علاقے کو گھیرے میں لے لیا۔