فیصل آباد(آئی این پی)اہلسنّت جماعتوں نے صاحبزادہ سیّد حامد سعید کاظمی کی رہائی کیلئے ملک بھر میں دستخطی مہم شروع کر دی ہے صاحبزادہ حامد سعید کاظمی کو سنائی گئی غیر منصفانہ سزا ختم کرنے کے مطالبہ پر مشتمل خصوصی یارداشت پر اہم شخصیات اور عوام سے دستخط کروائے جارہے ہیں تفصیلات کے مطابق یارداشت پر اب تک جن شخصیات نے دستخط کئے ہیں ان میں مرکزی رویت ہلال کمیٹی کے چیئرمین مفتی منیب الرحمن، عظیم ایٹمی سائنسدان ڈاکٹر عبد القدیر خان، رکن قومی اسمبلی جمشید دستی، برطانوی ہاؤس آف لارڈز کے رکن لارڈز نذیر احمد،سابق وفاقی وزیر حاجی محمدحنیف طیب، جامعہ نعیمیہ کے پرنسپل ڈاکٹر راغب حسین نعیمی، جے یو پی کے صدر پیر اعجاز ہاشمی، سابق وزیر مملکت پیر سید صمصام بخاری، تنظیم المدارس اہلسنّت پاکستان کے ناظم اعلیٰ صاحبزادہ عبد المصطفیٰ ہزاروی، سنی اتحاد کونسل پاکستان کے چیئرمین صاحبزادہ حامد رضا، سابق ممبر قومی اسمبلی میاں جلیل احمد شرقپوری، سابق صدر ملتان ہائیکورٹ بار وسیم ممتاز ایڈووکیٹ، سابق وزیر آزاد کشمیر صاحبزادہ حافظ حامد رضا اور دیگر شامل ہیں۔ چیف جسٹس کے نام خصوصی یارداشت میں لکھا گیا ہے کہ چیف جسٹس صاحبزادہ سیّد حامد سعید کاظمی کو انصاف فراہم کریں اور میرٹ پر ان کے مقدمے کا فیصلہ کروائیں۔ صاحبزادہ سید حامد سعید کاظمی پر ایک پائی کی کرپشن بھی ثابت نہ ہونے کے باوجود انہیں سزا سناکر ظلم کیا گیا ہے۔اس لئے صاحبزادہ حامد سعید کاظمی کی سزا ختم کرکے انہیں باعزت رہا کیا جائے۔