لاہور (این این آئی ) لاہور میں آسان اقساط پر گاڑیاں دینے کے نام پر کر وڑوں کا فراڈ کر کے کمپنی کا مالک فرار ہو گیا ،1200سے زائد متاثرین نے رقوم کی واپسی کے لئے فیصل ٹاؤن میں کمپنی کے دفتر کے باہر سڑک بلا ک کر کے شدید احتجاج کیا ، پولیس نے کمپنی کے اکاؤنٹنٹ کو گرفتار کر لیا ۔ بتایا گیا ہے کہ آسان اقساط پر گاڑیاں دینے کے نام پر کروڑوں روپے کا فراڈ کر کے مالک فرار ہو گیا ۔ فیصل ٹاؤن کے علاقہ میں ایک کارڈیلر نے لو گوں سے 7ماہ قبل ، ایک ،دو اور تین لاکھ کے چیک لیے اور تمام درخواست فارم پُر کرنیوالوں کو رقم وصولی کی رسیدیں بنا کر دیں اور کاریں دینے کا وعدہ بھی کیا لیکن کچھ ہی عرصہ بعد جب کاریں نہ ملیں تودرخواست گزاروں کو پتہ چلا کہ ان کے ساتھ فراڈ ہو گیا ہے ۔ متاثرین نے رقوم واپس نہ ملنے پر پیسے بٹورنے والے کا ر ڈیلر کے خلاف بھرپور احتجاجی مظاہر ہ کیا۔ فراڈ کا شکار ہونیوالے 1200سے زائد متاثرین نے احتجاج کر تے ہوئے فیصل ٹاؤن روڈ بلا ک کر دی جس سے ٹریفک کی لمبی قطاریں لگ گئیں ۔ اطلاع ملنے پر پولیس کی بھاری نفری موقع پر پہنچ گئی ۔پو لیس کا کہنا تھا کہ ہم نے اکاؤنٹنٹ کو گرفتار کر لیا ہے اور بہت جلد فرار ہونیوالے مالک کو بھی گرفتارکر لیں گے ۔ پو لیس سے مذاکرات کے بعد مظاہرین نے احتجاج ختم کردیا ۔