لاہور(این این آئی )تحریک انصاف کے مرکزی رہنما عبدالعلیم خان نے کہا ہے کہ حکومتی صفوں میں بڑے پیمانے پر انتشار پھیل چکا ہے اور شاہی طرز حکومت مزید نہیں چل سکے گا ،بجٹ پاس ہوتا نظر نہیں آرہا اور انشا ء اللہ عید کے بعد تبدیلی کا فیصلہ کُن مرحلہ طے ہو گا ۔عبدالعلیم خان نے این اے122کے مختلف علاقوں گوشت مارکیٹ ،گڑھی شاہو اورعلامہ اقبال روڈ کے دورے کے موقع پر خطاب کرتے ہوئے کہا کہ وقت ثابت کر رہا ہے کہ پی ٹی آئی ہی اصل اپوزیشن اور ملک کا سیاسی مستقبل عمران خان سے ہی وابستہ ہے نواز لیگ کے گزشتہ 3برس مایوسی ،ناامیدی ،جھوٹ اور بوگس وعدوں کے علاوہ کچھ نہیں تھے ناقص نظام اور تبدیلی کی باتیں کرنے والے وفاقی وزراء سے قوم پوچھتی ہے کہ انہوں نے ان تین برسوں میں مہنگائی ،بیروزگاری اور کرپشن پر کیوں قابو نہیں پایا ۔عبدالعلیم خان نے ایم پی اے شعیب صدیقی کے ہمراہ یونین کونسل 123کے چےئرمین ذوالقرنین ذکی کی طرف سے دی گئی افطار پارٹی میں شرکت کی جہاں پی ٹی آئی کے مقامی رہنما ناصر جٹ،امجد پرویز ،رضوان یوسف،اسلم بھٹی اور حافظ عامر بھی موجود تھے بعد ازاں انہوں نے پی ٹی آئی کے کارکن امجد کے والد ،عمران ورک کے تایا،پرویز سوہنی کے بیٹے اور سلیم شبراتی کے عزیزکے انتقال پر گہرے دکھ اور افسوس کا اظہار کرتے ہوئے فاتحہ خوانی کی اور مرحومین کی مغفرت کی دعاء کی ۔عبدالعلیم خان نے پی پی147سے ایم پی اے شعیب صدیقی کے ہمراہ این اے122کے مختلف علاقوں میں گلیوں اور سیوریج کی نا گفتہ بہہ صورتحال کا جائزہ لیا جبکہ عبدالعلیم خان فاؤنڈیشن کے زیر اہتمام واٹر فلٹریشن پلانٹ اور ڈسپنسریوں کے قیام پر بھی تبادلہ خیال کیا اس موقع پر لوگوں کی بڑی تعداد نے عبدالعلیم خان کا علاقے کی فلاح و بہبود میں ذاتی طور پر دلچسپی لینے پر شکریہ ادا کیا جبکہ علاقے کی خواتین نے پینے کا صاف پانی ملنے پر مسرت کا اظہار کرتے ہوئے عبدالعلیم خان کو پھولوں کے ہار پہنائے اور اُن کی درازی عمر کیلئے خصوصی دعائیں کیں ۔