کابل (نیوز ڈیسک) طور خم بارڈر پر پاک افغان سکیورٹی فورسز کے مابین فائرنگ سے پیدا ہونے والی صورتحال کے بعد افغانستان میں جذبہ حب الوطنی جاگ گئی ہے اور اس کی ایک تازہ مثال افغان میڈیا کی ایک خاتون اینکر بھی ہیں ۔ نجی ٹی وی کے ایک پروگرام کے مطابق خاتون اینکر زارا بہار نے 13 جون 2016کو اپنے فیس بک اکاؤنٹ پر طور خم بارڈر کی جھڑپوں کی تصاویر شئیر کرنے کے ساتھ ساتھ ڈاکٹر عامر لیاقت حسین کے رمضان پروگرام میں بطور آرمی جوان کی تصویر کو سوشل میڈیا ویب سائٹ فیس بْک پر شئیر کیا اور اسٹیٹس میں لکھا کہ یہ طور خم بارڈر پر پاک فوج کے شہید جوانوں کی تصاویر ہیں۔اینکر کی اس پوسٹ کے باعث سوشل میڈیا پر افغان میڈیا کی خاصی جگ ہنسائی بھی ہوئی کہ انہیں اس بات کا علم ہی نہیں ہے کہ ڈاکٹر عامر لیاقت کی بطور پاک آرمی افسر وہ تصویر ان کی رمضان ٹرانسمیشن کے پرومو کا ایک حصہ ہے۔ دوسری جانب متعدد سوشل میڈیا صارفین نے خاتون اینکر زارا بہار کو اس حقیقت سے آگاہ کرنے کی کوشش کی لیکن وہ اپنی بات پر ’’میں نہ مانوں ہار ‘‘ کے مصداق ڈٹی رہیں اور یہ منطق پیش کی کہ انہوں نے یہ تصاویر گوگل سے لی ہیں لہٰذا وہ غلط نہیں ہو سکتیں۔