اسلام آباد (اے پی پی) وفاقی وزیر اطلاعات و نشریات سینیٹر پرویز رشید نے کہا ہے کہ اقتدار کیلئے اقدار کا جنازہ نکالنے والے عمران خان کو تاریخ کبھی معاف نہیں کرے گی، وزیر اعظم کا دامن صاف ہے، اسی لئے انہوں نے خود کو اور اپنے خاندان کو احتساب کیلئے پیش کر دیا،عمران خان کا دامن بھی صاف ہوتا تو وہ بھی احتساب کیلیے پیش ہوتے۔ اتوار کو اپنے ایک بیان میں انہوں نے کہا کہ وزیر اعظم محمد نواز شریف سوات کے عوام کیلئے ترقیاتی منصوبے لے کر گئے۔ انہوں نے کہاکہ عمران خان سڑک سے سوات جاتے تو انہیں نئے خیبر پختونخوا کے کھنڈرات نظر آجاتے۔انہوں نے کہا کہ عمران خان گزشتہ 3 سال سے ایک ہی تقریر کرر ہے ہیں، انہیں چاہے کہ جلسوں میں عوام کا پیسہ ضائع کرنے کے بجائے ایک کیسٹ ریکارڈ کرالیں۔ انہوں نے کہا کہ عمران خان وزیراعظم کے اعلان کردہ ترقیاتی منصوبوں پر تنقید کیلئے سوات گئے ۔ انہوں نے کہا جہانگیر ترین کے معاف کرائے گئے قرضے قومی دولت ہیں ، اسی قومی دولت سے عمران خان عیاشی کرر ہے ہیں۔ سینیٹر پرویز رشید نے کہا کہ اقتدار کیلئے اقدار کا جنازہ نکالنے والے عمران خان کو تاریخ کبھی معاف نہیں کرے گی ۔ انہوں نے کہا کہ عمران خان نے شوکت خانم میں ایمرجنسی علاج کرایا تھا اور باقاعدہ علاج کیلئے باہر بھی گئے تھے