فیصل آباد(نیوزڈیسک)شوگر ملز سے بھارتی ایجنٹوں کی گرفتاری ،حکومت کھل کرسامنے آگئی،بتایا جائے کس شوگر مل سے گرفتاریاں ہوئیں،پرویزرشید کاچیلنج،، وفاقی وزیر اطلاعات و نشریات سینیٹر پرویز رشید نے شوگر مل سے بھارتی ایجنٹوں کی گرفتاری کی خبروں کوسختی سے مسترد کرتے ہوئے کہا ہے کہ بتایا جائے کس نے شوگرمل سے گرفتاریاں کیں ؟حکومت کل بھوشن کے معاملے پر تمام ضروری اقدامات اٹھارہی ہے ٗ کچھ عناصر کو حکومت کی کامیابی ہضم نہیں ہورہی ٗ الزامات لگانے والے پاکستان کو کامیابیوں سے محروم کرنا چاہتے ہیں ٗ ہم مقابلہ کر نے جانتے ہیں ۔ اتوار کو یہاں تقریب کے بعد میڈیا سے بات چیت کرتے ہوئے وفاقی وزیراطلاعات پرویزرشید نے کہاکہ 2013 میں دہشت گرد دیدہ دلیری کے ساتھ دندناتے پھرتے تھے اور روزانہ کی بنیاد پر 3 سے 4 دھماکے ہوتے تھے تاہم اب پاکستان پہلے کے مقابلے میں زیادہ محفوظ اور پرامن ہے ٗنیشنل ایکشن پلان پر بھرپور طریقے سے عمل درآمد ہورہا ہے ٗ ہمارے جوانوں نے امن کے قیام کیلئے قربانیاں دیں اور اپنا آج قوم کے کل پر قربان کردیا۔ فرقہ واریت کی بنیاد پر نفرت پھیلانے والوں کے خلاف کارروائی ہورہی ہے۔پرویزرشید نے کہاکہ حکومت نے پیٹرول اوربجلی کی قیمتوں میں کمی کی اورپیٹرول کی قیمت میں کمی کی وجہ سے ہی اشیا کی قیمتوں میں بھی کمی ہورہی ہے ۔ پاکستانی روپے کی قیمت بھی مستحکم ہوئی اور قوت خرید میں بھی اضافہ ہوا ۔ وزیر اعظم نواز شریف نے پاکستانی کرنسی کو بے وقعت ہونے سے بچایا ٗان تمام اقدامات کی نگرانی اور ہدایات خود وزیر اعظم نے کی تاہم کچھ عناصر کو حکومت کی کامیابی ہضم نہیں ہورہی اوراب مخالفین شوگر مل سے غیر ملکیوں کے پکڑے جانے کی جھوٹی افواہیں پھیلا رہے ہیں بتایا جائے کس نے شوگر مل سے گرفتاریاں کی ہیں اور پکڑے گئے بھارتی ایجنٹ کہاں ہیں ؟ الزامات لگانے والے نواز شریف کی کامیابیوں پر حسد کرتے ہیں ’’را‘‘ پاکستان میں اس لیے کام کررہی ہے تاکہ پاکستان ترقی نہ کرے اور یہی کام مخالفین بھی کررہے ہیں اب پاکستان کو ترقی کی راہ پر گامزن کرنے والوں اور را کا سوال اٹھانے والوں میں مقابلہ ہے ٗحکومت بیک وقت سازشوں، دھرنوں ، را کے ایجنٹوں اور ان کی ہی زبان بولنے والوں کے ساتھ مقابلہ کررہی ہے۔بھارتی ایجنٹ کلبھوشن کے بارے میں وفاقی وزیر نے کہا کہ کلبھوشن کے معاملے پرحکومت تمام ضروری اقدامات کررہی ہے ٗ بھارتی سفارتی نمائندے کو دفترخارجہ بلاکراحتجاج کیا گیا اوربھارتی ہائی کمشنرکو شواہد سے آگاہ کردیا گیا ہے اورتمام سفارتخانوں کو بھی ہدایات جاری کردی گئی ہیں کہ وہ اس مسئلے سے دنیا کو آگاہ کریں۔