لاہور(نیوز ڈیسک) نیشنل ڈیزاسٹر مینجمنٹ اتھارٹی نے آئندہ دنوں میں مزید بارش کے امکان پر ایڈوائزری جاری کردی۔ تمام صوبائی ڈیزاسٹر مینجمنٹ اتھارٹی اور متعلقہ محکموں کو الرٹ جاری کردیا گیا۔ این ڈی ایم اے کے مطابق بارشوں کا بننے والا نیا سسٹم بلوچستان میں داخل ہو چکا ہے ۔نئے بننے والے سسٹم کے تحت بلوچستان ،خیبر پختوانخواہ ، فاٹا اور پنجاب کے مختلف علاقوں میں آئندہ چند روز کے دوران بارش کا امکان ہے۔بلوچستان میں جمعرات اور جمعہ کے روز گرج چمک کے ساتھ بارش کا امکان ہے۔ خیبرپختونخوا کشمیر اور فاٹا میں جمعرات سے ہفتے تک بارش کا سلسلہ جاری رہے گا۔ اسلام آباد ،راولپنڈی ،گوجرانوالہ ،لاہور اور فیصل آباد میں جمعرات کی شام تک بارش کا امکان ہے ۔پنجاب کے بالائی علاقوں میں بارش کا یہ سلسلہ اتوار تک جاری رہے گا۔ بہاولپور ملتان ڈیرہ غازی خان اور سندھ کے بالائی علاقوں جمعرات کی شام میں بارش کا سلسلہ شروع ہو گا۔