لاہور(نیوز ڈیسک) ممتاز ایٹمی سائنسدان ڈاکٹر عبد القدیر خان نے کہا ہے کہ پرویز مشرف کی بیرون ملک روانگی بارے حکومت کو بتانا چاہیے ،اسے قوم کا معاملہ سمجھا ہی نہیں گیا ، متروکہ وقف املاک بورڈ کے سربراہ نے ہسپتال کےلئے اراضی کا معاملہ اپریل کے پہلے ہفتے تک حل ہونے کی یقین دہانی کرائی ہے ۔ گزشتہ روزٹیلیفون پر خصوصی گفتگو کرتے ہوئے ڈاکٹر عبد القدیر خان نے پرویز مشرف کی بیرون ملک روانگی کے حوالے سے سوال کے جواب میں کہا کہ اس بارے تو حکومت کو بتانا چاہیے اور شاہد چوہدری نثار کچھ بتابھی چکے ہیں۔ یہ حکومت اور عدلیہ کے درمیان معاملہ تھا ، اسے قوم کا معاملہ تو سمجھا ہی نہیں گیا ۔ انہوں نے اپنے ہسپتال کےلئے اراضی کی دستیابی کے حوالے سے سوال کے جواب میں کہا کہ متروکہ وقف املاک بورڈ کے سربراہ صدیق الفاروق نے بتایا ہے کہ اپریل کے پہلے ہفتے میں میٹنگ ہو گی جس میں یہ معاملہ حل ہونے کی امید ہے۔