کراچی (نیوز ڈیسک) ایم کیو ایم کے نامزد میئر کراچی وسیم اختر نے کہا ہے کہ انہیں نامعلوم نمبر سے قتل کی دھمکیاں مل رہی ہیں ، اگر انہیں کچھ ہوا تو سندھ حکومت ذمہ دار ہوگی ۔ کراچی میں اے ٹی سی کورٹ کے باہر میڈیا سے بات چیت کرتے ہوئے ایم کیو ایم کے نامزد میئر کراچی وسیم اخترنے کہا کہ ایم کیو ایم کی صفائی مہم کو سازش کا نشانہ بنا کر سبوتاژ کیا گیا ہے ، ایم کیو ایم میں صفائی کرانے والوں کو شہر میں ایم کیو ایم کی صفائی مہم اچھی نہیں لگی ۔ وسیم اختر نے کہا کہ انہیں نامعلوم نمبرز سے قتل کی دھمکیاں دی جا رہی ہیں اور خاموشی اختیار کرنے کا کہنا جا رہا ہے ۔ ان کا کہنا تھا کہ انہیں دھمکی دی جا رہی ہے کہ اگر وہ خاموش نہیں ہوئے تو انہیں قتل کر دیا جائے گا یا ان کے بچوں کو اغوا کر لیا جائے گا ۔ وسیم اختر نے وفاقی وزیر داخلہ ، کور کمانڈر کراچی ، ڈی جی رینجرز اور وزیر اعلی سندھ سے تحفظ فراہم کرنے کی اپیل کی ہے ۔ انہوںنے کہا کہ اگر انہیں کچھ ہوا تو اس کی ذمہ دار سندھ حکومت ہوگی ۔