لاہور (نیوزڈیسک) لاہور ہائیکورٹ کے جسٹس خالد محمود خان نے اقتصادی راہداری منصوبے کےخلاف دائر درخواست پر سماعت کے لیے لارجر بنچ تشکیل دینے کی سفارش کردی۔ گزشتہ روز لاہور ہائیکورٹ کے جسٹس خالد محمود خان کے روبرو اقتصادی راہداری منصوبے کے خلاف درخواست پر سماعت ہوئی جس میں اقتصادی راہداری پراجیکٹ کو چیلنج کیا گیا ہے۔ درخواست میں اعتراض اٹھایا گیا کہ اقتصادی راہداری منصوبہ ملکی مفاد کے تابع نہیں،اس منصوبے کے کول پاور پلانٹ لگائے جا رہے ہیں جس سے آلودگی پھیلے گی۔ درخواست میں استدعا کی گئی کہ اقتصادی راہداری منصوبے پر کام روکنے کا حکم دیا جائے۔ لاہورہائیکورٹ کے جسٹس خالد محمود خان نے قرار دیا کہ یہ معاملہ اہم نوعیت کا ہے اس پر سماعت کے لارجر بنچ تشکیل دیا جائے۔ جسٹس خالد محمود خان نے درخواست چیف لاہور ہائیکورٹ کو بھجواتے ہو ئے لارجر بنچ تشکیل دینے کی سفارش کر دی ۔