کراچی (نیوز ڈیسک ) پاکستان اسٹیل کی موجودہ انتظامیہ ملک کے مروّجہ قوانین اور قواعد و ضوابط پر یقین رکھتی ہے اور اپنے انتظامی اور مالی اُمور میں شفاف طریقہءکار پر عمل پیرا ہے۔پاکستان اسٹیل میں انٹر نل آڈٹ کا نظام نہ صرف بہترین انداز سے کام کررہاہے بلکہ اے اینڈ پی ڈائریکٹریٹ میں سیکورٹی ڈیپارٹمنٹ کے ماتحت اینٹی کرپشن اینڈ اکاﺅنٹیبلٹی سیل بھی اپنے فرائض اَحسن طریقے سے انجام دے رہا ہے۔ موجودہ انتظامیہ کے دور میں خام مال کی درآمد اور دیگر خریداری کے معاملات کو شفاف انداز سے قواعد و ضوابط کے مطابق کیا جاتا ہے اور مصنوعات کی فروخت بھی شفاف پالیسی کے تحت کی جاتی ہے۔ اِن معاملات کو پاکستان اسٹیل کی ویب سائٹ پر اَپ لوڈ کر دیا جاتا ہے۔پاکستان اسٹیل کی موجودہ انتظامیہ ملک کے مختلف اداروں کے ساتھ بھرپور تعاون کرنے پر یقین رکھتی ہے ۔ اس سلسلے میں نیشنل اکاﺅنٹیبلیٹی بیور(نیب) کی 3 رُکنی کمیٹی نے پاکستان اسٹیل کا دورہ کیا ۔ اس موقع پر نیب کی کمیٹی کے ارکان کو پاکستان اسٹیل کے بارے میں آپریشنز بلڈنگ کے کانفرنس روم میں تفصیلی بریفنگ دی گئی۔ اس اجلاس میں پاکستان اسٹیل کے چیف ایگزیکٹو آفیسر میجر جنرل(ر)ظہیر احمد خان کے ہمراہ ادارے کے سینئر افسران بھی شریک ہوئے۔