لاہور(نیوزڈیسک)پنجاب حکومت نے عوام کو سرکاری ہسپتالوں میں علاج معالجے کی بلا تعطل فراہمی کی غرض سے ڈاکٹروں او رپیرا میڈیکل سٹاف کی ہڑتال اوراحتجاج کی صورت میںلازمی سروس ایکٹ کے نفاذ کا فیصلہ کرلیا۔ ذرائع کے مطابق حکومت نے ڈاکٹروں اور پیرا میڈیکل سٹاف کی طرف سے کام چھوڑ ہڑتال کے باعث مریضوں کو درپیش مشکلات کو دیکھتے ہوئے آئندہ اس طرح کے کسی بھی احتجاج کو روکنے کےلئے لازمی سروس ایکٹ کے نفاذ کا فیصلہ کر لیا ہے ۔ محکمہ صحت کے مطابق لازمی سروس ایکٹ کی خلاف ورزی کی صورت میں قانون کے مطابق سخت کارروائی عمل میں لائی جائے گی ۔ پیرا میڈیکل سٹاف نے بھی 16مارچ کو مطالبات کے حق میں دھرنا دینے کا اعلان کر رکھا ہے ۔ یاد رہے کہ محکمہ صحت ، ریسکیو 1122، شہری دفاع سمیت دیگر بعض محکمے لازمی سروس ایکٹ کے زمرے میں آتے ہیں ۔