اسلام آباد (نیوز ڈیسک) سابق گورنر پنجاب سلمان تاثیر کے بیٹے شہباز تاثیر کی بازیابی سے متعلق تجزیہ نگاروں کا کہنا ہے کہ ممتاز قادری کی پھانسی پر عملدرآمد شہباز تاثیر کی بازیابی کے بعد کیا گیا، سکیورٹی اداروں نے شہباز تاثیر کو گزشتہ ماہ بازیاب کرا لیا گیا تھا مگر انہیں ممتاز قادری کی پھانسی سے پہلے منظر عام پر نہیں لایا گیا اور جب ممتاز قادری کی پھانسی اپنی تکمیل کو پہنچ گئی اور اس پر احتجاج کا سلسلہ بھی تھم گیا تو پھر شہباز تاثیر کو سامنے لایا گیا۔ ذرائع کے مطابق اغوا کار شہباز تاثیر کو کچلاک میں السلیم ہوٹل کے قریب چھوڑ کر گئے۔ شہباز تاثیر نے اس ہوٹل سے کھانا کھایا اور ساڑھے تین سو روپے بل بھی ادا کیا۔ ہوٹل مالک کا کہنا ہے کہ شہباز تاثیر اکیلا ہی ہوٹل آیا تھا۔ کھانا کھانے اور بل کی ادائیگی کے بعد کال کرنے کیلئے فون مانگا۔ ذرائع کا کہنا ہے کہ شہباز تاثیر نے اس کے بعد فون پر والدہ سے بات کی۔ شہباز تاثیر کی والدہ نے انٹیلی جنس حکام کو بیٹے کی بازیابی سے آگاہ کیا۔ اس کے بعد انٹیلی جنس حکام نے موقع پر پہنچ کر شہباز تاثیر کو تحویل میں لے لیا۔