کراچی(نیوز ڈیسک) ایم کیو ایم کے سابق سٹی ناظم مصطفی کمال نے اپنی نئی سیاسی جماعت کا اعلان کرتے ہوئے اس کے منشور کو بھی میڈیا کے سامنے پیش کیا، تاہم انہوں نے پارٹی کا نام نہیں بتایا صرف اس کے جھنڈے کی نمائش کی جو قومی پرچم ہے۔ اپنے منشور میں انہوں نے ملک میں صدارتی نظام کے نفاذ کے حوالے سے کہا کہ وزیراعظم منتخب نمائندے صرف قانون سازی کرے جبکہ صدر ایسے افراد پر مشتمل ایک ٹیم بنائے جو ملک میں ترقی کے لیے اقدامات کرے۔ انہوں نے مضبوط بلدیاتی نظام کی تشکیل پر زور دیا اور کہا کہ اس میں ٹاؤن کی سطح تک اختیارات ہونی چاہیے تاکہ عام آدمی کو فائدہ ہوسکے۔ تعلیم، صحت کے حوالے سے انہوں نے کہا کہ اس کا معیار بہت گر چکا ہے، سرکاری ہسپتالوں میں غریبوں کے لیے ادویات نہیں ہے۔ دنیابھر میں لوکل باڈی نظام کو اہمیت دی جاتی ہے۔ انہوں نے کہا کہ نئے شہر بسانے کی ضرورت ہے اس کے لیے قومی اربن پالیسی لائی جائے، دیہی علاقوں میں سہولتیں فراہم کی جائیں تو لوگ شہر کی جانب ہجرت نہیں کریں گے۔ مصطفی کمال نے انتظامی بنیاد پر نئے صوبوں کے قیام کو بھی اپنی پارٹی کا منشور کا حصہ بنایا ہے۔