اسلام آباد (نیوز ڈیسک) پاکستان تحریک انصاف کے چئیرمین عمران خان نے کہا ہے کہ آزاد کشمیر میں ووٹر فہرستیں نادرا کے ریکارڈ کے مطابق بننی چاہئیں۔ تاکہ آزاد کشمیر کے انتخابات شفاف اور منصفانہ ہوں ورنہ اس سے نہ صرف آزاد کشمیر کے عوام کے بنیادی حقوق متاثر ہونگے بلکہ تحریک آزاد ی ءکشمیر پر بھی اسکے منفی اثرات مرتب ہونگے۔یہ چیز ظاہر کرتی ہے کہ دونوں حکومتوں کی ملی بھگت سے جان بوجھ کرنو ماہ تک چیف الیکشن کمشنر کا تقرر نہیں کیا گیااور اب وقت کی کمی کا بہانہ بنا کر کمپیوٹرائز ووٹر فہرستیں مکمل نہیں کی جارہی ہیں۔ان خیالات کا اظہار انھوں نے آج یہاں بنی گالہ میں اپنی رہائشگاہ پر آزاد کشمیر کے سابق وزیر اعظم و کشمیر پی ٹی آئی کے صدر بیرسٹر سلطان محمود چوہدری سے ڈیڑھ گھنٹے تفصیلی ملاقات میں کیا۔ اس موقع پر پی ٹی آئی کے مرکزی رہنماءجہانگیر خان ترین،حامد ناصر چٹھہ اور کشمیر پی ٹی آئی کے چیف آرگنائزر ظفر انور بھی موجود تھے۔ عمران خان نے کوٹلی جلسے کی کامیابی پر کشمیر پی ٹی آئی کو مبارکباد دی اور کہا کہ اس سے واضح ہو گیا ہے کہ عوام اب کشمیر پی ٹی آئی میں شامل ہو چکے ہیں اگراوچھے ہتھکنڈے استعمال کرکے آزاد کشمیر کے الیکشن میں دھاندلی کی کوشش کی گئی تو ہم خاموش نہیں بیٹھیں گے۔اس موقع پر بیرسٹر سلطان محمود چوہدری نے عمران خان کو آزاد کشمیر میں پارٹی کے تنظیمی امور اور آئندہ الیکشن کی تیاریوں کے حوالے سے بھی بریفنگ دی۔