اسلام آباد (نیوز ڈیسک) سابق گورنر پنجاب سلمان تاثیر کے قاتل ممتاز قادری کو پھانسی دینے کا معاملہ اتنا خفیہ رکھا گیا کہ جلاد کو بھی پتہ نہ چل سکا۔ پھانسی کے طریقہ کار کے مطابق جلاد کو دو دن قبل ہی آگاہ کر دیا جاتا ہے کہ اس نے کس جیل میں قیدی کو تختہ دار پر لٹکانا ہے لیکن ممتاز قادری کے معاملے میں انتہائی احتیاط برتی گئی اور پھانسی اڈیالہ جیل میں دی گئی جبکہ اس کام کیلئے مقامی جلاد کی بجائے لاہور سے جلاد کو لایا گیا۔ ذرائع کا کہنا ہے کہ ممتاز قادری کو پھانسی دینے والے جلاد کو کچھ بتائے بغیر ہفتے کی شب خصوصی گاڑی میں لاہور سے اڈیالہ جیل پہنچایا گیا اور اس جلاد کو یہ بھی معلوم نہیں تھا کہ اس نے کس کوپھانسی دینی ہے۔ واضح رہے کہ 4 جنوری 2011ء میں ایلیٹ فورس کے کمانڈو ممتاز قادری نے گورنر پنجاب سلمان تاثیر کو قتل کیا تھا۔