لاہو ر(نیوز ڈیسک) پاکستان بار کونسل نے چیف جسٹس آف پاکستان سے آئین کے آرٹیکل دو سو نو کے تحت سپریم جوڈیشل کونسل کو فعال کرنے کا مطالبہ کر دیا۔ گزشتہ روز وائس چیئرمین پاکستان بار کونسل سینیٹر فروغ نسیم کی زیر صدارت اجلاس کے بعد اعلامیہ جاری کر دیا گیا۔پاکستان بار کونسل کی طرف سے جاری اعلامیے میں چیف جسٹس پاکستان انور ظہیر جمالی سے مطالبہ کیا گیا ہے کہ آئین کے آرٹیکل دو سو نو کے تحت قائم سپریم جوڈیشل کونسل کو فعال کیا جائے، اعلامیے کے مطابق پاکستان بار کونسل انصاف کی فراہمی کے نظام کو بہتر بنانے کیلئے پرعزم ہے، اعلامیے کے مطابق وائس چیئرمین پاکستان بار کونسل سینیٹر بیرسٹر فروغ نسیم نے واضح کیا ہے کہ انکے دور میں میرٹ ہی پہلا اصول ہے، اس لئے نہ صرف سپریم جوڈیشل کونسل کو فعال کیا جائے بلکہ تمام صوبائی بار کونسلز ب?ی اپنی کمیٹیوں کو فعال کر کے کالی بھیڑوں کو اپنی صفوں سے نکال کر وکلاء برادری کے وقار کو تحفظ فراہم کریں۔ اعلامیے کے مطابق وائس چیئرمین پاکستان بار کونسل نے مزید کہا ہے کہ نئے وکلاء کی انرولمنٹ کا عمل شفاف بنایا جائے اور ملک بھر کے لاء کالجز بھی پاکستان بار کونسل کے قواعد و ضوابط پر عملدرآمد کریں۔