کوہاٹ(نیوز ڈیسک)پاکستان کے صوبے خیبر پختونخوا کے ضلع کوہاٹ میں ناظم نے شہر میں ویلنٹائن ڈے کی تقریبات پر پابندی عائد کر دی ہے۔ضلع ناظم کے دفتر سے جاری ہونے والا حکم نامہ جمعے کو ضلعی پولیس افسر کو فراہم کر دیا گیا ہے۔جس میں کہا گیا ہے کہ شہر میں ویلنٹائن ڈے پر پابندی عائد کر دی گئی ہے۔اس حکم نامے میں کہا گیا ہے کہ تمام متعلقہ تھانوں کو ہدایات جاری کی جائیں کہ شہر کے بازاروں اور مارکیٹس میں ویلنٹائن ڈے کے حوالے سے کارڈز اور دیگر مواد کی خریدو فروخت کو روکا جا سکے۔یہ حکم نامہ گذشتہ روز جاری کیا گیا لیکن اب تک پولیس نے اس سلسلے میں کوئی بڑی کارروائی نہیں کی ہے۔ضلع کوہاٹ میں جمعیت علماء4 اسلام فضل الرحمان گروپ کے ناظم مولانا نیاز محمد نے یہ حکم نامہ جاری کیا ہے۔اس حکم نامے میں پابندی کی وجوہات بیان نہیں کی گئیں۔مقامی لوگوں کا کہنا ہے کہ یہ پابندی اس لیے عائد کی گئی ہے کیونکہ بقول ضلعی ناظم کے یہ دن منانا غیر شرعی ہے۔اس بارے میں ضلعی ناظم مولانا نیاز محمد سے رابطے کی بارہا کوشش کی لیکن ان سے رابطہ نہیں ہو سکا۔صوبے کے دیگر شہروں میں ویلنٹائن ڈے کے حوالے سے دکانوں پر کارڈز اور تحائف کی خرید و فروخت معمول سے جاری ہے۔کوہاٹ میں ویلنٹائن ڈے پر پہلے بھی کوئی بڑی تقریبات منعقد نہیں ہوتی تھیں تاہم چند ایک دکانوں پر اس دن کی مناسبت سے کارڈز اور تحائف کی خریدو فروخت ضرور ہوتی ہے۔