کراچی (نیوز ڈیسک) کراچی کے مضافات میں کالعدم تنظیموں کے نیٹ ورک کا انکشاف ہوا ہے جو کہ دن بدن مضبوط ہورہا ہے۔ ذرائع کے مطابق شہرقائد اور مضافات میں کالعدم تنظیموں کے 10سے زائد گروپس سرگرم ہیں اور کافی فعال ہوچکے ہیں ۔رپورٹ کے مطابق کالعدم تنظیموں کے مختلف دھڑے شہر قائد میں مضبوط جگہ بناچکے ہیں جبکہ کراچی میں ماضی میں ہونے والے مختلف بڑے دہشت گردی کے واقعات میں کالعدم تنظیموں کے ملوث ہونے کے ثبوت بھی سامنے آچکے ہیں جن میں سانحہ صفورا ،ایئرپورٹ حملہ ،رینجرز اہلکار قتل ،ملٹری پولیس کیس ،ٹریفک اہلکار قتل کیس ،پولیس موبائلوں پر حملے ،سبین محمود قتل کیس میں بھی کالعدم تنظیموں کی کڑیاں ملی ہیں ۔رپورٹ کے مطابق سہراب گوٹھ کا ٹی ٹی پی کمانڈر خان زمان خان کالعدم تنظیموں کو یکجا کررہا ہے ۔خان سجنا گروپ ،چھوٹا عابد گروپ ،گل کان ،گل زمان ،قادر ملنگ گروپ سمیت دیگر گروپوں کو عراقی انتہا پسند تنظیم داعش میں ضم کررہا ہے جبکہ القاعدہ امیر شکیل برمی دونوں گروپوں کی کمان کررہا ہے ۔کاو¿نٹرٹیررزم ڈپارٹمنٹ کے مطابق رضوان عرف آصف چھوٹو گروپ ،حافظ قاسم گروپ ،مولوی فضل اللہ گروپ اور عمر خالد خراسانی گروپ بھی داعش میں شامل ہو کر اپنی قوت کو یکجا کررہے ہیں ۔سی ٹی ڈی ذرائع کا کہنا ہے کہ خان زمان خان اور آصف چھوٹو کے سرکی قیمت 25,25لاکھ روپے مقرر ہے ۔سی ٹی ڈی ذرائع کا کہنا ہے کہ سرکاری املاک پر حملے بھی یہی گروپس کررہے ہیں اور اسی گروپ نے حالیہ محرم الحرام میں 6بم دھماکے کرانے تھے مگر حساس اداروں نے یہ منصوبہ ناکام بنادیا تھا ۔