اسلام آباد(نیوزڈیسک)مسلم لیگ (ن) کے رہنماء رکن قومی اسمبلی طلال چوہدری نے کہا ہے کہ پاکستان کی فلاح اور بہتری کےلئے ہر سیاسی جماعت سے مک مکا کر سکتے ہیں،حکومت نے پی ٹی آئی کے استعفے منظور نہیں کئے کیا یہ مک مکا نہیں تھا۔وہ جمعہ کو عمران خان کے بیان پر رد عمل دے رہے تھے۔ انہوں نے کہا کہ عمران خان ہمیشہ قوم سے جھوٹ بولتے ہیں،اپنی باتوں کو چھپانے کےلئے جان بوجھ کر غلط بیانی سے کام لیتے ہیں، عمران خان وزیرداخلہ کی پریس کانفرنس دوبارہ غور سے سنیں، وزیرداخلہ نے یہ نہیں کہا کہ پیپلز پارٹی سے مک مکا ہوا ہے، انہوں نے صرف اپوزیشن لیڈر کو تنقید کا نشانہ بنایا، کیونکہ خورشید شاہ چوہدری نثار بارے اکثر تنقیدی جملے کہتے رہتے تھے۔ عمران خان کے ذاتی گھر یا یونیورسٹی کے پلاٹ کا معاملہ ہو، میاں نواز شریف نے ہمیشہ عمران خان کے سر پر ہاتھ رکھا۔ عمران کو گھر اور یونیورسٹی کےلئے زمینیں دیں، وزیراعظم نے عمران خان کو بہت فیور کیا، خدا کےلئے قوم سے جھوٹ بولنا چھوڑ دیں۔