اسلام آباد (نیوزڈیسک) مسلم لیگ ن کے سینیٹر نثار محمد نے کہا ہے کہ 34 اسلامی ممالک کے اتحاد میں شمولیت کا فیصلہ پارلیمنٹ میں سیر حاصل بحث کے بعد کیا جائے ۔تمام اسلامی ممالک اپنے اپنے ملکوں کے حالا ت اور عوامی امنگوں کی ترجمانی کرتے ہوئے باہمی اخوت کے رشتوں کو مضبوط بنانے پر توجہ دیں ۔انہوں نے کہا کہ اسلامی ممالک درپیش معاشی ، اقتصادی مسائل کے خاتمے اور دہشت گردی سے موثر طور پر نمٹنے کیلئے آزادانہ خارجہ پالیسی پر عمل کریں ۔سینیٹر نثار محمد نے کہا کہ عالمی مسلط کردہ جنگ کی وجہ سے پاکستان نے معاشی تباہی کے علاوہ ہزاروں جانوں کی قربانیاں دی ہیں ۔پاکستان کا آج تک کسی بھی عالمی اتحاد میں شمولیت کا فائدہ نہیں ہوا ۔پاکستان کی مجوزہ اسلامی اتحاد میں شمولیت سے مشرق وسطیٰ اور شط العرب کے اسلامی ممالک کے ساتھ تعلقات کے حوالے سے منفی پیغام جائے گا۔دو مسلمان اسلامی ممالک باہمی جنگوں میں ایک دوسرے کے خلاف فریق بننے کی بجائے ثالث کا کردار ادا کیا جانا چاہیے ۔سینیٹر نثار محمد نے ایوان بالاء میں قومی سلامتی کے مشیر سرتاج عزیز کی طرف سے واضع جواب نہ دینے کے حوالے سے کہا ہے کہ عوام کی ترجمان پارلیمنٹ اور عوام کو اصل حقائق سے آگاہ کیا جائے ۔