اسلام آباد(نیوزڈیسک) وفاقی حکومت نے اس موقف کااظہار کیا ہے کہ سندھ حکومت رینجرز اختیارات میں کمی نہیں کرسکتی، سندھ حکومت کے بھیجے گئے خطوط پر وفاقی حکومت نے جواب دے دیاہے ۔ اسلام آباد میں وفاقی حکومت کے ذرائع کا کہنا ہے کہ وفاقی حکومت سمجھتی ہے کہ رینجرز وفاقی حکومت کا ادارہ ہے او ر صوبائی حکومت اس کے اختیارات پر قدغن نہیں لگا سکتی اور کراچی میں رینجرز کی طرف سے دہشت گردوں اور جرائم پیشہ افراد کےخلاف جاری آپریشن کا تسلسل برقرار رکھاجائے گا۔ایک نجی ٹی وی چینل کے مطابق ذرائع نے کہا کہ کراچی آپریشن کو منطقی انجام تک پہنچانا ازحد ضروری ہے۔ سندھ حکومت کی جانب سے لکھے گئے خط کے متن سے ظاہر ہوتا ہےکہ صوبائی حکومت رینجرز کے اختیارات پر قدغن لگانا چاہتی ہے۔ جبکہ رینجرز کے اختیارات متعلقہ قوانین میں واضح کردئیے گئے ہیں۔ کوئی صوبائی انتظامیہ اپنی مرضی کے اختیارات وفاقی دفاعی ادارے پر لاگو نہیں کرسکتی اور نہ ہی” آدھا تیتر، آدھا بیٹر“ والا معاملہ چلے گا۔ ذرائع نے کہا کہ کراچی پاکستان کی معاشی سرگرمیوں کا مرکز و محور ہے۔ اہل کراچی کو پائیدار امن یقینی بنانے کےلئے تمام سیاستی جماعتوں کے اعتماد سے شروع کیاگیا آپریشن محض کسی ایک جماعت یا گروہ کی خواہش پر ادھورا نہیں چھوڑا جائے گا۔ذرائع کے مطابق وفاق کے رینجرز کے اختیارت کے بارے میں جواب پرپیپلزپارٹی کی قیادت نے رینجرز کے اختیارات کومحدودکرنے رکھنے کی قرارداد کوبرقراررکھنے کےلئے اپنی اعلی قیادت سے فیصلہ کرلیاہے ۔وفاقی وزیر داخلہ چوہدری نثار نے سندھ حکومت کی جانب سے رینجرز کے اختیارات محدود کرنے کی سمری مسترد کردی ہے ۔نجی نیوز چینل کے مطابق وفاقی وزیرکی زیر صدارت اجلاس ہوا جس میں فیصلہ کیا گیا ہے کہ سندھ حکومت کے رینجرز پر قدغن کے حوالے سے موقف کو مسترد کیا جائے گا ۔چوہدری نثارنے کہا ہے کہ سندھ حکومت کا رینجرز کے حوالے سے موقف غیر قانونی ہے ۔