اسلام آباد (نیوزڈیسک)دہشت گردی کیخلاف سعودی اتحاد میں پاکستان کی شمولیت،تحریک انصاف نے عوام سے پوشیدہ سنگین غلطی کی نشاندہی کردی،پاکستان تحریک انصاف کی سیکرٹری اطلاعات ڈاکٹر شیریں مزاری نے پاکستان کی سعودی عرب کی قیادت میں دہشتگردی کے خلاف اتحاد میں شمولیت پر تشویش کا اظہار کرتے ہوئے کہاہے کہ اس سے زیادہ پریشان کن امریکہ کا بیان ہے جس میں اسے سنی اتحاد قرار دیکر اس کا خیر مقدم کیاگیا ہے ۔ایک بیان میں شیریں مزاری نے کہاکہ معلوم نہیں کہ کس نے پاکستان کی اس اتحاد میں شمولیت کی منظوری دی یہ ہماری لئے حیران کن ہے انہوںنے کہاکہ ایک ایسا اتحاد جس میں ایران کو باہر رکھا گیا ہے مسلمان ملکوں کے درمیان مزید خلفشار کا باعث بنے گا ۔اس اتحاد کا مقصد ایران کو تنہا کر نا ہے ۔انہوںنے مطالبہ کیا کہ حکومت واضح طورپر بتائے کہ یہ اتحاد کیسے بنایا گیا اور ایران کو اس میں شامل کیا جائے کیونکہ اس کے بغیر انتہا پسندی اور دہشتگردی کے خلاف اسلامی ممالک کا اتحاد حقیقی نہیں ہوگا ۔