لاہور(نیوز ڈیسک) عوامی تحریک کے سربراہ ڈاکٹر طاہر القادری آج 5بجے صبح وطن پہنچیں گے جہاں انکا کارکنان کی طرف سے پر تپاک استقبال کیا جائے گا اور سربراہ عوامی تحریک مرکزی سیکرٹریٹ میں صبح 8بجے میڈیا کے نمائندوں سے بات چیت کریں گے۔پاکستان عوامی تحریک اور تحریک منہاج القرآن کے سیکرٹریٹ میں جشن کا سماں رہا کارکن رات بھر اپنے محبوب قائد کے استقبال کی تیاریاں کرتے رہے۔شدید سردی اور دھند کے باعث دیگر اضلاع کی تنظیمات اور کارکنوں کو لاہور آنے سے روک دیا گیا۔کارکنوں کو صرف 23دسمبر کو عالمی میلاد کانفرنس میں شرکت کی ہدایت کی گئی۔سربراہ عوامی تحریک کے استقبال کیلئے صرف لاہور سے کارکنان آئیں گے۔استقبال کی تیاریوں کے سلسلے میں منعقدہ اجلاس سے خطاب کرتے ہوئے خرم نواز گنڈا پور نے کہاکہ سربراہ عوامی تحریک شہدائے ماڈل ٹاو¿ن کے ورثا سے ملاقات کریں گے۔میڈیا سے بات چیت کریں گے۔انہوں نے کہا کہ لاہور نے ہمیشہ پاکستان کی سیاست میں اہم کردار ادا کیا ہے ،اہل لاہور ہزاروں کی تعداد میں ائر پورٹ پہنچ کر اپنے محبوب قائد کا استقبال کریں گے۔سربراہ عوامی تحریک ریلی کی صورت میں مرکزی سیکرٹریٹ آئیں گے ،یوتھ ونگ اور ایم ایس ایم کے سینکڑوں نوجوان سیکیورٹی کے فرائض انجام دیں گے۔ائر پورٹ پر ڈاکٹر حسن محی الدین ،ڈاکٹر حسین محی الدین ،خرم نواز گنڈا پور،احمد نواز انجم،جی ایم ملک ،بریگیڈئیر(ر) اقبال احمد ،بشارت جسپال ،مرکزی سیکرٹری اطلاعات نور اللہ صدیقی استقبال کریں گے۔23دسمبر کی رات ڈاکٹر طاہر القادری مینار پاکستان میں تاریخی عالمی میلاد کانفرنس سے خطاب کریں گے۔عالمی میلاد کانفرنس کیلئے تمام دینی ،سیاسی و سماجی جماعتوں کو شرکت کی دعوت دی گئی ہے۔