اسلام آباد،پشاور(آن لائن)سانحہ آرمی پبلک سکول کی مرکزی تقریب میں وزیر اعظم نواز شریف ، آرمی چیف جنرل راحیل شریف سمیت ملک کی سیاسی و عسکری قیادت شریک ہے، تقریب کا آغاز تلاوت کلام پاک سے ہوا،اس سے قبل سانحہ اے پی ایس پشاور کے شہدا کے اہل خانہ اور دیگر لواحقین اپنے پیاروں کی تصاویرکے ساتھ تقریب شریک ہوئے ،ان کی آمد پر وزیراعظم نوازشریف ،آرمی چیف جنرل راحیل شریف سمیت تمام شرکا کھڑے ہوگئے۔وزیراعظم ،آرمی چیف اور ان کی اہلیہ نے شہدا کے لواحقین کو فرداً فرداً خوش آمدیدکہا،تقریب میں تحریک انصاف کے سربراہ عمران خان ،امیر جماعت اسلامی سراج الحق ،اے این پی کے رہنما غلام بلورسمیت دیگر سیاسی و مذہبی جماعتوں کے رہنما شریک ہیں،تقریب میں وزیرخزانہ اسحاق ڈار ،وزیر داخلہ چوہدری نثار علی خان،وزیر دفاع خواجہ آصف ،وزیراعلیٰ پنجاب شہباز شریف ،وزیراعلیٰ بلوچستان ڈاکٹر عبدالمالک ،گورنر خیبر پختونخوا سردار مہتاب ،وزیراعلیٰ پرویز خٹک اور وزیراعلیٰ سندھ سید قائم علی شاہ بھی شریک ہیں،سانحہ کی یاد میں اور شہدا و اساتذہ کو خراج تحسین پیش کرنے کیلئے پنجاب ،سندھ ،بلوچستان ، خیبر پختونخوا کے تمام تعلیمی اداروں میں تعطیل ہے، جبکہ دارالحکومت اسلام آباد میں سکولوں اور کالجوں میں شہدائے اے پی ایس کے شہداء کو خراج عقیدت پیش کرنے کیلئے مختلف تقاریب کا انعقاد کیا گیا ۔