اسلام آباد(نیوزڈیسک)آرمی پبلک سکول کے شہداءکو خراج تحسین،عمران خان اورشہبازشریف کے اعلان کے بعدوزیراعظم نے بھی اہم اقدام کی منظوری دیدی، وزیراعظم نوازشریف نے اسلام آباد کے 122 اسکولوں اور کالجوں کو شہدائے آرمی پبلک اسکول کے ناموں سے منسوب کرنے کی منظوری دے دی۔گزشتہ سال 16 دسمبر کو پشاور کے آرمی پبلک اسکول پر حملے کے نتیجے میں 130 سے زائد بچے شہید ہوئے تھے جن کی پہلی برسی کے موقع پر ملک بھر میں ان کو خراج تحسین پیش کیا جارہا ہے جب کہ اس موقع پر وزیراعظم نوازشریف نے اسلام آباد کے 122 اسکولوں اور کالجوں کے نام شہدائے اے پی ایس کے ناموں سے منسوب کرنے کی منظوری دیدی ہے۔وزیر اعظم نواز شریف نے اپنے پیغام میں کہا کہ دشمن نفرت اور انتہا پسندی چاہتے ہیں لیکن ہم برداشت کو فروغ دے کر ان کا جواب دیں گے، ہم علم دشمنوں کو کبھی بھی کامیاب نہیں ہونے دیں گے۔ انہوں نےکہا کہ آرمی پبلک اسکول کے شہید بچوں نے اپنی جانوں کا نذرانہ دے کر جہالت کا مقابلہ کیا اور روشن خیال کی بنیاد رکھی، شہدا کی یادیں مادر وطن کی بقا کے ساتھ جڑی ہیں اور شہدا کی یادوں کو وطن کی بقا سے الگ نہیں کیا جاسکتا، ان کی قربانی کو ہمیشہ یاد رکھا جائے گا۔