لاہور(نیوزڈیسک). پاکستان تحریک انصاف کے چیئرمین عمران خان این اے 122 لاہور کے ضمنی الیکشن کے سلسلے میں چار اکتوبر کو سمن آباد کے ڈونگی گراؤنڈ میں جلسہ عام سے خطاب کرینگے سمن آباد کے ڈونگی گراؤنڈ میں پی ٹی آئی کے 4 اکتوبر کو منعقد کیے جانے والے جلسے کی تیاریاں زورو شور سے جاری ہیں۔ گرائونڈ کے مغرب کی جانب ایک بڑا اسٹیج کی تیارکیا جا رہا ہے عمران خان جس راستے سےگرائونڈ میں داخل ہوں گے، وہیں سے اسٹیج پر چڑھ جائیں گے۔عمران خان کے ہمراہ مخصوص قیادت ہو گی جبکہ اسٹیج پر آنے والوں کے لیے خصوصی کارڈز دیے جائیں گے جو پی ٹی آئی کی قیادت جاری کرے گی۔ سی سی پی او لاہور کیپٹن امین وینس کا کہنا ہے کہ جلسے کی سیکورٹی کے فول پروف انتظامات کیے گئے ہیں ۔عام پبلک اور خواتین کی جلسہ گاہ آمد کے لئے الگ الگ گیٹس مخصوص کئے گئے ہیں، جبکہ داخلہ واک تھرو گیٹس اور ہینڈسکینر کی تلاشی سے مشروط ہوگا ۔گراؤنڈ میں بیس ہزار سے زائد کرسیاں لگائی جائینگی جبکہ بجلی کی بلا تعطل فراہمی کے لیے ہیوی جنریٹرز استعمال کئے جائینگے ۔ میڈیا کی کوریج کےلیے بڑے کنٹینرز پر انتظام کیا گیاہے۔