کراچی( نیوز ڈیسک)بھارتی فوج کی پاکستان دشمنی اور ان کے ناپاک اراوے ایک بار پھر سامنے آگئے، پاک فوج کے ہیڈ کوارٹر راولپنڈی پر حملے کے ارادے کرنے لگے۔ سری نگر کے اخبار”رائزنگ کشمیر“ کے مطابق بارمولا میں بھارتی فوج کے 19ویں انفنٹری ڈویژن کے بریگیڈیئر جے ایس چیمہ نے کہا ہے کہ بھارتی فوج کے پاس راولپنڈی میں پاک فوج کے ہیڈ کوارٹر پرحملے کا ایک آپشن ہے۔جنگ رپورٹر رفیق مانگٹ کے مطابق انہوں نے یہ بات سری نگر میں15 کور ہیڈ کوارٹرز میں فوج کی طرف سے منعقد ایک کانفرنس سے خطاب کرتے ہوئے کہی ،انہوں نے کہا کہ کیاہم کسی دوسرے26نومبر کے لئے انتظار کر رہے ہیں؟۔ انہوں نے کہا کہ دہلی کو بھی اسلام آباد کے ساتھ ویسا ہی نمٹنا چاہیے جیسا اسامہ کے لئے امریکا نے ایبٹ آباد میں آپریشن کیا۔ بھارتی فوج پہلے ہی ایک دوسرے ملک میانمار میں جاکر اس طرح کی کارروائی کرچکی ہے۔بریگیڈیئر چیمہ نے کہا کہ فوج کوکشمیر میں حریت پسند قیادت کو غیر متعلقہ بنانے میں اہم کردار ادا کرنے کی ضرورت ہے۔ 19ویں انفنٹری ڈویڑن کے میجر جنرل راج شکلا نے اپنی تقریر میں کہا کہ نئی دہلی کواسلام آباد کی بیجنگ سے بڑھتی فوجی شراکت داری کے بارے میں فکر کرنے کی ضرورت نہیں۔ جنگوں میں پاکستان کو بچانے کبھی چین نہیں آیا۔انہوں نے کہا کہ جہاں تک بھارت پاکستان ملٹری تعلقات کا تعلق ہے، بھارتی فوج وسیع نقطہ نظر میں دفاعی پوزیشن میں ہے
لیکن آپریشنل اور ٹیکنیکل سطح پر جارحانہ ارادے ہیں۔برگیڈیر جے ایس چیمہ نے کہا کہ پاکستان نے کسی تنازع کا آغاز کیا تو بھارتی فوج کئی طریقوںسے تنازعات پیدا کرے گی۔اور راولپنڈی میں پاکستانی فوج کے ہیڈ کوارٹر پر حملہ کرنے کا ایک آپشن ہے۔
