اسلام آباد(نیوزڈیسک)قومی اسمبلی میں اپوزیشن لیڈر سید خورشید شاہ نے نیب اور ایف آئی اے کی مانیٹرنگ اور احتساب کیلئے پارلیمانی کمیشن کے قیام کی تجویز دےتے ہوئے کہا ہے کہ اداروں کو سیاستدانوں کی تضحیک کیلئے استعمال نہیں ہونے دینگے، احتساب کرنیوالے اداروں کا بھی احتساب ہونا چاہے۔ایک انٹرویومیں خورشید شاہ نے کہاکہ نیب اور ایف آئی اے کے خلاف انتقامی کارروائیوں کی شکایات آتی رہتی ہیں .وزیر اعظم سے ملاقات میں پارلیمانی کمیشن کے قیام کی تجویز دینگے . پارلیمانی کمیشن سے کسی کو نیب پر الزام تراشی کی ضرورت نہیں رہے گی . چیئرمین نیب جتنے بھی اچھے ہوں ان پر بھی نگران کمیشن ہونا چاہے۔ خورشید شاہ نے کہا کہ احتساب صرف سیاستدانوں کا نہیں سب کا ہونا چاہے۔ ہمارے ہاں کبھی احتساب حکومت کے ماتحت ہو جاتا ہے تو کبھی غائب ہو جاتا ہے۔ انہوں نے کہا کہ علی نواز شاہ اور خادم شاہ کو نیب نے 5،5 لاکھ روپے کے الزام میں سزا دلوائی، نیب جب ایسے اقدامات کریگا تو اس پر شکوک شبہات مزید بڑھیں گے، انہوں نے کہا کہ ماورائے آئین کسی اقدام کی حمایت نہیں کرینگے، احتساب کے عمل میں مقدس اور غیر مقدس گائے کا عمل ختم ہونا چاہیے۔